Damian Gjiknuri i ka kaluar sot zyrtarisht detyrën e Sekretarit të Përgjithshëm të PS-së, kolegut të tij, Blendi Klosi.
Gjatë fjalës së tij, Gjiknuri paralajmëroi se në shtator do të nis procesi zgjedhor në Partinë Socialiste, ndërsa iu “bind” me përulësi vendimit të Edi Ramës i cili e “zhveshi” nga të gjitha postet e PS-së, njësoj siç veproi me Arben Ahmetajn i cili më pas i hapi rrugë SPAK-ut për ta hetuar për aferën e inceneratorëve.
“Kjo është një ditë e veçantë për mua, pasi pas 2 vitesh ia dorëzoj këtë detyrë një kolegu. PS iu nënshtrua një procesi riorganizimi. PS iu nënshtruar një organizimi që nga drejtimi i partisë deri te sekretariatet. PS ka nisur një proces analize mbi këtë rezultat, dhe sekretariatit iu ofrua që të jepej dorëheqje. Në shtator do të jemi në një proces reformimi. Respektoj vendimin e kryeministrit Edi Rama.
Befasia për disa dhe interesi që shkakton në rrjetet sociale nuk duhet të përbëjë boshtin nga duhet të orientohet koshienca ime. Pas çdo procesi zgjedhor ne i ushtrohemi një procesi analize. Nuk e quaj në ato terma që ju thoni. Për mua fundi i diçkaje është fillimi i një gjëje të re.
Unë jam akuzuar gjithmonë pasi kam mbajtur pozicione kyçe. Nuk është hera e parë që akuzohemi për akuza të karakterit politik. Ka vetëm një drejtësi që i gjykon, dhe jo opinioni publik krijuar nga vatra të ndryshme politike. Personalisht nuk ndjej asnjë lloj braktisje, jam në komunikim të vazhdueshëm me kreun e partisë, është marrëdhënie e qëndrueshme pune. Sa më pozicione të larta te kesh, aq më tepër edhe do sulmohet.
Hetimi ka vite që ka nisur, nuk më kanë thirrur ndonjëherë, nëse do më thërrasin natyrshëm do të jap shpjegim. Roli i ministrit të energjisë ka qenë periferik…”, tha Gjiknuri.
Hetimet e SPAK/ A do t’i bashkohet Gjiknuri, Ahmetajt në arrati apo në burg?
Në dokumentet e hartuar nga prokurorët e SPAK, rezulton se, krahas dyshimeve se ish-ministrat Lefter Koka dhe Arben Ahmetaj, kanë përgjegjësi penale në procedurat e ndjekura për dhënien me koncesion të impiantit të përpunimit të mbetjeve në Elbasan, është përfshirë në mënyrë të drejtëpërdrejtë më së paku edhe një i tretë, Damian Gjiknuri, ish-ministër i Infrastrukturës në vitin 2014, kur qeveria i dorëzoi koncesionin rreth 30 milionë euro kompanisë “Albtek Energy” të Stela Gugalljas, bashkëjetuese e Mirel Mërtirit.
Në materialin e zgjeruar dorëzuar në Parlament për Arben Ahmetaj, prokurorët e posaçëm ka konstatuar se Gjiknuri ka dhënë dakordësinë për këtë procedurë, e cila rezulton e paligjshme.
“Me shkresën datë 17.11.2014 të Ministrit të Industrisë dhe Energjisë, Damian Gjiknuri, i është kthyer përgjigje shtetasit Lefter Koka, Ministër i Mjedisit (në atë kohë), ku shprehen parimisht dakord, duke shprehur se përzgjedhja e procedurës së koncesionit është e drejtë e autoritetit kontraktor (Ministrisë së Mjedisit, shën.red)…”, thuhet në dokumentin e SPAK-ut.
Gjithnjë sipas SPAK-ut, Ministria e Gjiknurit ka pasur rol thelbësor në procedurën koncesionare.
“…Rezulton i administruar një dokument, “Impiant i përpunimit të mbetjeve urbane në qytetin e Elbasanit, studim fizibiliteti, me kokën e Ministrisë së Mjedisit, i përgatitur në nëntor 2014, i nënshkruar nga 6 persona…Në pikën 2 të këtin dokumenti, ‘Analiza Teknike’, është shënuar se Projekti pritet të ketë aktorë kryesorë në nivel kombëtar; Ministrinë Zhvillimit Ekonomik, Tregtisë dhe Sipërmarrjes; Ministrinë e Infrastrukturës dhe Energjisë dhe Ministrinë e Financave…”.
Për llogari të hetimit të saj, SPAK shprehet se, “siç vihet re, një aktor shumë i rëndësishëm është Ministria e Zhvillimit Ekonomik…”.
