Nga Boldnews.al
Pak muaj më parë, zyrtarë të lartë të qeverisë duke filluar nga ish-ministri i Brendshëm, Bledi Çuçi, zv.kryeministrja Belinda Ballku, ish-drejtoresha e IKMT-së Dallëndyshe Bici dhe krerë të lartë të Policisë së Shtetit, vizituan disa kantiere ndërtimi. Nga zona e Dajtit, Farkës, në qendër të Tiranës, ata deklaruan se kanë konstatuar kate pa leje në ndërtimet shumë katëshe.
“Ky subjekt ka bërë një ndryshim skandaloz të projektit nga ai i miratuar. Ka edhe kate la leje. Kjo nuk është fushatë mediatike apo demagogji” do te deklaronte ish-ministri Çuçi, nga kantieri i një pallati në rrugën “Myslym Shyri”.
Pallati 13 katësh është ndërtuar nga firma “ARB & TRANS-2010”. Sipas Qendrës Kombëtare të Biznesit, firma është në pronësi të z. Shyqyri Malokut, babait të Arben Malokut, i cili ka qenë kryetar i Njësisë Administrative në Zall Herr. Ndërkohë, sipas mediave, Arbeni që e ka themeluar këtë shoqëri në vitin 2010 është edhe kryetar i PS-së në atë zonë. Pas këtij operacioni, nuk pati asnjë reagim për sekuestrimin e kateve pa leje, denoncimin e pronarit apo edhe të tjera masa administrative apo penale. Nëse për një qytetar të thjeshtë ligji është i rreptë, me ndalime dhe arrestime, për Malokun apo për “të njëjtët e tjerë” ligji është i butë; vijojnë punimet, shiten hyrjet dhe i jepen edhe tendera të tjerë!
Sipas dokumenteve që disponon BoldNews.al, Bashkia e Kurbinit ka finalizuar tenderin me procedurë të kufizuar, marrëveshje kuadër në kuadër të procesit të rindërtimit. Bëhet fjalë për objektin e kontratës “rindërtimi në truallin ekzistues të 2 (dy) njësive të banimit (pallate), pallati nr.5 dhe pallati nr.6 në Bashkinë Kurbin, në kuadër të proçesit të rindërtimit”. Fondi për këtë tender është plot 320.883.630 lekë. Ose, me TVSH rreth 3.2 milionë euro. Mësohet se kontrata është lidhur në datën 17 korrik 2023 ndërmjet Bashkisë së Kurbinit dhe bashkimit të operatorëve “ARB & TRANS-2010” me përfaqësues ligjor z. Shyqyri Maloku dhe “EVEREST” me përfaqësues ligjor z. Sokol Çupi.
Pra, e thënë më shjeshtë, firma e z. Shyqyri Maloku, babait të Arbenit, është “shpërblyer” për ndërtimet e kateve pa leje në Tiranë. Nëse në një vend normal, me institucione të pa korruptuara, një firmë të tillë nuk i jepej asnjë leje ndërtimi, në këtë vendin tonë kjo firmë fiton edhe tendera. Fjalët e Çuçit që s’është fushatë mediatike, duken se janë zbehur me kalimin e kohës. Çuci u hoq nga posti i ministrit, Dallëndyshja kaloi nga IKMT në Kadastër, ku do të certifikojë pikërisht këto ndërtime pa leje. Dhe, nga ana tjetër, të njëjtët shkelës të ligjit, jo vetëm që s’janë ndëshkuar penalisht apo administrativisht, por marrin sërish para publike “me thasë”. Duket se aksioni i këtyre ndërtimeve ka qenë një fushatë e mirëfilltë gjobash, madje i bërë edhe para zgjedhjeve lokale të 14 majit. Firmat janë vënë në radhë për të mbështetur kandidatët e PS-së, ku ndër këto firma ka qenë edhe “ARB & TRANS-2010”, e cila ka mbështetur Veliajn dhe Carën në Kurbin. I pari ia hoqi “njollën” e ndërtimit pa leje, ndërsa e dyta e “shpërbleu” me një tender të majmë!
