5 kamionë të tonazhit të rëndë janë shkrumbuar nga flakët në fshatin Shpërdhet të Kurbinit, në një zjarr që dyshohet të ketë qenë i qëllimshëm.
Mjetet ndodheshin në guroren e administruar nga shtetasi me inicialet B. A., i cili ka deklaruar në polici se autorët e ngjarjes janë persona të njohur për të.
Burime bëjnë me dije se i dëmtuari ka identifikuar autorët dhe i ka deklaruar ata në polici.
Megjithatë, pavarësisht se bëhet fjalë për individë me precedentë penalë, policia nuk ka ndërmarrë asnjë veprim për arrestimin e tyre.
Madje ngjarja ka ndodhur disa ditë më parë, por policia nuk e ka bërë publike.
Drejtori i ri i Policisë së Qarkut Lezhë, Ermal Muça, duket se e ka nisur me dështim detyrën e rëndësishme që i është besuar pasi heshtja dhe mosveprimi i strukturave policore në një rast kaq flagrant, ku autorët janë të njohur dhe të deklaruar, ngre alarmin për një neglizhencë të patolerueshme në menaxhimin e rendit publik.
