Pa u mbushur tre muaj nga miratimi i rritjes së pagës së pedagogëve me 30%, Ministria e Arsimit ka përgatitur një projekt-udhëzim i cili rrit ngarkesën e profesorëve e lektorëve në auditorë duke e bërë nul rritjen.
MediaLook disponon draftin “Për disa shtesa dhe ndryshime në udhëzimin nr.29/2019 për veprimtarinë dhe ngarkesën mësimore të personelit akademik në IAL, i ndryshuar”. Sipas këtij udhëzimi pedagogët e kategorisë “Profesor” do të zhvillojnë 180 nga 140 orë mësimore, pra 40 orë më shumë nga sa zhvillojnë aktualisht.
Rritje kanë pësuar dhe dy kategoritë e tjera. Lektorët pësojnë një rritje prej 35 orësh, nga 165 që zhvillojnë aktualisht në 200 ore në auditor. Ndërkohë që asistentë-pedagogëve do u shtohen 15 orë. Me udhëzimin aktual ato zhvillojnë 195 orë, ndërsa në draftin e ri parashikohet të zhvillojnë 210.
Por ndërsa ngarkesa e punës për profesorët dhe lektorët është rritur me afro nga 21-28.6% sipas kategorive, mundësia e marrjes së orëve shtesë kundrejt pagesës është ulur me 50%.
“Orët suplementare në auditor nuk mund të jenë më shumë se 100 orë mësimore të pagueshme, brenda një viti akademik”, – thuhet në draftin e propozuar. Në udhëzimin aktual një pedagog ka mundësinë e marrjes së 200 orëve shtesë.
| NGARKESA MËSIMORE VJETORE NË AUDITOR PËR PEDAGOGËT ME KOHË TË PLOTË | |||
| Kategoria | Udhëzimi aktual | Propozohet të rritet në | Ndryshimi në % |
| Profesor | 140 orë | 180 orë | 28.6% |
| Lektor | 165 orë | 200 orë | 21.2% |
| Asistent-lektor | 195 orë | 210 orë | 7.7% |
Ndërkaq, udhëzimi i propozuar rrit koficentin e konvertimit të 1 ore leksion me 1.25 orë mësimore për leksionet, ndërsa lë të pandryshuar në raportin 1 me 1 seminareve apo punëve laboratorike. Por rritja e koeficientit nuk pritet të ketë efekt financiar të ndjeshëm në pagë veçanërisht në ato programe studimi të cilat në kurrikulat e tyre janë orientuar më shumë drejt punëve praktike e laboratorike, duke reduktuar leksionet në auditor.
Më 7 Prill, Kryeministri Rama njoftoi pas një mbledhje qeverie se mes pedagogët ishin në radhën e atyre profesioneve që do të përftonin ngritje page. “Një rritje do të ketë edhe për pedagogët e cila përllogaritet me 20%, me një diskrecion që mund të shkojë deri në 30%”, – do të deklaronte kreu i qeverisë një muaj para mbajtës së zgjedhjeve lokale.
Nëse projekt-udhëzimi i ri i Ministrisë së Arsimit, që rrit ngarkesën e profesorëve në auditor dhe lektorëve do të miratohet, kjo do të ishte në fakt një zerim i kësaj rritje.
