24 vite burg është masa e caktuar nga Gjykata e Sarandës për dy autorët e grabitjes me armë të noterit Thoma Kaçi, ngjarje e ndodhur në 20 tetor 2021. Samet Brahimi, 35-vjeç nga Shkodra, i dënuar më parë në Greqi për “vrasje” dhe Ilia Mata, 30-vjeç nga Tirana, u dënuan me nga 18 vite burg secili për “vjedhje me armë” dhe “mbajtja pa leje dhe prodhimi i armëve, armëve shpërthyese dhe municionit”.
Në aplikim të gjykimit të shkurtuar u dënuan me nga 12 vite burg, ndërsa Elis Avduli alias Mile Xhafa, 54-vjeç nga Konispoli, i dënuar më parë në Greqi për “trafik droge”, u shpall i pafajshëm. Për dy të parët, prokurori Ilir Hoxha kishte kërkuar të njëjtin dënim që dha gjyqtari Fatmir Ndreu, ndërsa për Avdulin kishte kërkuar 12 vite burg dhe me gjykim të shkurtuar 8 vite.
Si ndodhi grabitja
Në momentin kur noteri nga Saranda, Thoma Kaçi, po dilte me gruan dhe djalin nga banesa e tyre, në mëngjes dëgjuan derën të hapej nga dy grabitës të maskuar dhe të armatosur. Nën kërcënimin e armës ata i detyruan të futen sërish brenda duke i lidhur në karrige, dhe më pas u bënë presion për t’u treguar se ku i fshihnin paratë. Pas kërcënimeve të vazhdueshme, Kaçi u tregoi se ku ndodheshin paratë. Ata morën 20 mln lekë të vjetra në banesë dhe më pas u larguan. Noteri arriti të telefonojë policinë, dhe ishin efektivët që e liruan nga karrigia.
