Nga Boldnews.al
Në muajin tetor të vitit 2021, në kulmin e euforisë për “Open Balkan, kryeministri Edi Rama tha se do ndërtohet hekurudha Durrës-Prishtinë.
“Presim me padurim që të punojmë për hekurudhën, Durrës – Prishtinë dhe më pas të lidhet me Nishin, që sërish e sjell të gjithë investimin në një rrjet më të gjerë, jo vetëm oirajonal, por edhe evropian”, pohoi Rama.
Në atë kohë, qeveria shqiptare ishte angazhuar për nismën Ballkanike pa kufij, teksa kjo nismë “la jashtë Kosovën”. Zhvillimet e mëvonshme dhe ato më kryesoret të këtij viti, 2023, duket se kanë “ngatërruar” edhe vetë Ramën. Konflikti në Veri të Kosovës solli ndarjen përfundimtare mes tij dhe kryeministrit të Kosovës, Albin Kurti. Rama anuloi mbledhjen e dy qeverive, teksa nga ana tjetër Kurti nuk e priti gjatë një vizite të Ramës në Kosovë. Dhe, pas këtyre zhvillimeve dhe ndarjeve, Rama po “hakmerret” ndaj Albin Kurtit?!
Natyrisht, të gjithë të dhënat dhe provat, të çojnë në një vendimmarrje të tillë. Sipas dokumenteve që disponon BoldNews.al, Hekurudha Shqiptare, një institucion në varësi direkte të zv.kryeministres Belinda Balluku, ka anuluar tenderin për studimin e fizibilitetit të hekuruhës Durrës-Prishtinë.
Vartësit e Ballukut e cila është tashmë e “preferuara” e Ramës, e kanë anuluar zyrtarisht për mangësi në dokumente, por ajo që fshihet nga pas është pikërisht marrëdhënia e tensionuar mes Ramës dhe Kurtit.
Por, çfarë i ka bërë Kurti kryeministrit tonë që sillet në këtë mënyrë? A nuk është prioritet ndërtimi i një hekurudhe të tillë, që do të lidhte dy shtete me kombësi të njëjtë? Por, edhe më gjerë?
Natyrisht, vëmendja e qeverisë sonë është te paraja. Në tetor të 2021-shit ende s’ishte lidhur marrëveshja me arabët për Portin e Durrësit. Dhe, në mungesë të një porti të ri tregtar, vendi ynë do e ketë të pamundur që të marrë mallra për Kosovën, Maqedoninë apo edhe Serbinë.
Zyrtarisht, në dokumentet e publikuara, Hekurudha Shqiptare thotë se në datën 20 korrik është anuluar ky tender. “Objekti i kontratës ishte ‘Studimi Fizibilitetit dhe Projekt- Ide për Lidhjen Hekurudhore Durrës-Prishtinë’, me fond limit 200.224.996 lekë pa TVSH. Arsyet e anulimit bazuar në ligjin ‘për Prokurimin Publik’, neni 98, pika 1 ‘konstaton se dokumentet e tenderit përmbajnë gabime ose mangësi të rëndësishme’” thuhet në këto dokumente.
Më herët, ky tender u ankimua edhe në Komisionin e Prokurimit Publik, për shkak se ishte paracaktuar. Por, në vendimin e anulimit nuk shkruhet për shkak të vendimit të KPP-së, çka përforcon faktin se e gjitha është një “hakmarrje” e Edi Ramës ndaj Albin Kurtit. Ndërtimi i linjës hekurudhore Durrës – Prishtinë, konsiderohet si një rëndësi e veçantë për Shqipërinë dhe Kosovën, pasi do të mundësojë një zhvillim të shpejtë të transportit hekurudhor të udhëtarëve dhe mallrave.
