Mbi 20 automjete kanë mbetur të bllokuara brenda tunelit të Komanit për shkak të protestës së banorëve të zonës kundër ndalimit të mjeteve lundruese.
Protestuesit janë ulur në tokë dhe kanë bllokuar totalisht tunelin për në kalatën e trageteve në Koman. Përmes saj, realizohen imbarkimet në tragetet që shkojnë në Valbonë si dhe udhëtimet drejt lumit të Shalës, të dyja destinacione të frekuentuara nga turistët gjatë verës.
Ishte një aksion i policisë për sekuestrimin e disa mjeteve lundruese më herët gjatë javës në Koman dhe Shalë, që ka sjellë pakënaqësinë e banorëve të cilët janë ngritur në protestë.
Banorët e Komanit, të prekur nga aksioni i policisë, kanë bllokuar mëngjesin e së shtunës tunelin hyrës për në Koman në shenjë proteste pas bllokimit të mjeteve të tyre lundruese.
Të mërkurën policia e shtetit filloi me zbatimin e planit të koduar “Lundrimi i sigurt”, ndërsa u sekuestruan në liqenin e Komanit disa mjete lundruese të cilat përdoreshin për transport turistësh.
Policia njoftoi sekuestrimin e 46 mjeteve lundruese (traget, skafë dhe varka artizanale) në liqenin e Komanit dhe në lumin e Shalës, që sipas bluve “ishin në cenim të ligjeve për lundrim dhe të kritereve të sigurisë (nuk kishin pajisur pasagjerët me jelekë shpëtimi) për transport ditor, për qëllime turistike, të vizitorëve në këto vende”.
Pas këtij aksioni banorët e Komanit dhe drejtuesit e bizneseve në luginën e Shalës protestuan në hyrje të bashkisë së Vaut të Dejës dhe kërkuan të priteshin nga kryetari i bashkisë Kristjan Shkreli. Banorët shprehën shqetësimet e tyre duke theksuar se një aksion i tillë po dëmton shumë turizmin në luginën e Shalës. Në përmbyllje, Shkreli premtoi mbështetje maksimale për banorët ndërsa tha se mjetet e konfiskuara do u kthehen pronarëve.
Ky nuk është aksioni i parë në liqenin e Komanit pasi dhe 2 javë më parë u konfiskua nga policia e shtetit 1 traget dhe 10 mjete të tjera lundrimi artizanale, ndërsa poseduesit e mjeteve u ndëshkuan me gjobë në vlerën 10 mijë lekë të reja.
