Seanca e sotme plenare në Kuvendin e Kosovës, është shoqëruar me përleshje fizike mes deputetëve.
Në momentin që kryeministri Albin Kurti ka qenë duke folur në lidhje me situatën e fundit të ndodhur në Veri, fjalimi i tij u ndërpre nga deputetët e opozitës që brohorisnin “rrenc”.
Fillimisht, në drejtim të zëvendëskryeministrit Besnik Bislimi u hodh ujë nga deputeti Mërgim Lushtaku, pasi ai largoi dhe grisi nga foltorja një foto-montazh të kryeministrit Kurti me hundë të zgjatur që opozita ia kishte vendosur aty.
Pastaj, situata u agravua me një përleshje mes deputetëve të PDK me ministrin e Financave, Hekuran Murati, si dhe anëtarë të tjerë të kabinetit qeveritar, e ndërsa goditjet mes deputetëve kanë prekur edhe Kurtin.
Kryeparlamentari Glauk Konjufca ka njoftuar që seanca të ndërpritet për 30 minuta.
“Shkojmë në pushim 30 minuta. Kurse ata që janë përgjegjës për sigurinë ta vazhdojnë punën e tyre për gjithçka që është e nevojshme”, tha Konjufca.
Momentet e dhunës kanë përfshirë për disa çaste Kuvendin, ndërkohë është dashur ndërhyrja e Gardës së Republikës, si dhe policia, që të bëhet qetësimi i situatës.
Debati publik në Kosovë mes opozitës dhe qeverisë, ka qenë i ashpër ditën e sotme pas publikimit ne media të përgjimeve të shefes së grupit parlamentar të Lëvizjes Vetëvendoje, Mimoza Kusari-Lila, ku ajo zhvillon biseda të ndryshme me nënkryetarin e Listes Serbe, Milan Radoiçiç.
