Janë zbardhur përgjime të reja nga dosja e SPAK për ish-zv.kryeministrin Arben Ahmetaj, për të cilin është kërkuar arrestimi nën akuzat për veprat penale: pastrim parash, deklarim të rremë e fshehje pasurie dhe korrupsion pasiv.
Bëhet fjalë për një telefonatë mes Mirel Mërtirit, i cili telefonon me telefonin e Klodian Zotos, shoferin e Arben Ahmetajt, Gonin, duke vërtetuar edhe një herë tjetër miqësinë e deputetit socialist me biznesmenët e inceneratorëve.
Telefonata është realizuar me më datë 5 Shtator 2017, në orën 16:38, dhe nga biseda kuptohet se Mërtiri i kërkon Gonit të lajmërojë Arben Ahmetajn se i është thyer telefoni. Pra, kuptohet që Mirel Mërtiri, i cili njihet edhe si Klodian Mërtiri, ka njohje dhe me shoferin e ministrit.
Shoferi: O Zoto!
Mertiri: O Gono!
Shoferi: Çfarë bën?
Mërtiri: Klodi jam, Klodi…
Mërtiri: Çfarë bën? Ça bëre ti lale?
Shoferi: Mirë.
Mërtiri: Ore se kam telefonin se m’u thye, thuaj i çik fratelos që ta dijë ai se mos më merr mua, kur mundet të më kontaktojë e s’më kap.
Shoferi: Të të marri këtu?
Mërtiri: Jo mo jo, ky është telefoni i Zotos, po pati gjë t’i shkruajë Zotos dhe i dal unë në telefon.
Mërtiri: Mirë mirë, thuaj ti se m’u thye telefoni.
Shoferi: E mirë vëlla, mirë.
Mërtiri: Si ka qenë ai?
Shoferi: Mirë po ja është në mbledhje, se kam takuar fare që nga ora 11.
Mërtiri: Po iku mirë në mëngjes? Vajtët mirë?
Shoferi: Po mirë, i çik presion rrugës, u nisëm vonë, u nisëm nga ora 9:20.
Mërtiri: Po andej nga Maqedonia, çfarë u bë?
Shoferi: Po, kanë dërguar Tanin, nuk e di.
Nga hetimet ka rezultuart se Arben Ahmetaj dyshohet si i përfshirë në korrupsion pasiv në 6 raste. Në kërkesën e SPAK drejtuar Kuvendit, thuhet se Arben Ahmetaj ka marrë përfitime të drejtpërdrejta e të tërthorta për inceneratorët, nga Klodian Zoto e Mirel Mërtiri.
Mazhoranca po zvarrit në Kuvend procesin për heqjen e imunitetit të Arben Ahmetajt dhe hapjen e rrugës për arrestimin e këtij të fundit, teksa seanca është programuar për t’u mbajtur ditën e nesërme në orën 10:00. Deputeti socialist është larguar nga Shqipëria që mesditën e të premtes, pak orë para se SPAK të firmoste kërkesën drejtuar Kuvendit për arrestimin e tij.
