Nga Boldnews.al
Gjykata e Lartë i kërkon Apelin të Posaçëm që të rishqyrtojë sërish masën e sigurimit për Ramazan Rrajën, nipi i deputetit të sapodorëhequr, Rrahman Rraja, i cili dyshohet si i përfshirë në atentatin kundër ish-prokurorit të Durrësit, Arjan Ndoja.
Kolegji Penal i Gjykatës së Lartë ka konstatuar problematika në vendimin e Gjykatës së Apelit të Posaçëm, e cila la në fuqi më herët vendimin e shkallës së parë për masënm “arrest me burg” ndaj Ramazan Rrajës.
Emri i familjes Rraja është shumë i përdorur publikisht gjatë ditëve të fundit, pas dhunës shtazarake që disa anëtarë të saj ushtruar ndaj dy kushërinjve Maja, për shkak se ankoheshin për zhurmat dhe dëmtimet e ardhura nga gurorja e të afërmëve të ish-deputetit socialist.
Ndërkohë, anëtarë të tjerë të kësaj familjeje janë bërë personazhe të kronikës së zezë edhe më herët.
Redjan Rraja, një i afërm i ligjvënësit socialist, Rrahman Rraja, akuzohet zyrtarisht për atentatin ndaj prokurorit Ndoja, në nëntor 2019, ku mbeti i vrarë shoferi i tij, Andi Maloku.
Ndërkohë, për të njëjtën ngjarje të rëndë, me urdhër të Prokurorisë së Posaçme është arrestuar edhe Ramazan Rraja, djali i vëllait të deputetit Rrahman Rraja.
Ndaj tij, Gjykata e Posaçme kishte caktuar masën e sigurimit “arrest me burg” në mungesë, në nëntor të vitit 2022, nën dyshimet si pjesëmarrës në organizatë kriminale. Në momentin e arrestimit, atij iu gjet edhe një pistoletë pa leje, për të cilën prokurorët ngritën akuzën e “armëmbajtjes”.
Pasi u arrestua dhe u njoh me masën e sigurimit ndaj tij, Ramazan Rraja kërkoi nga Apeli i Posaçëm lirimin nga qelia, nën argumentin se nuk ka lidhje me atentatin ndaj prokurorit.
Gjykata e Posaçme e Apelit, në Prill të vitit 2023, vendosi të lërë në fuqi masën e arrestit në burg, me argumentin se ankimi është dorëzuar tej afatit ligjor.
Rraja ushtroi rekurs në Gjykatën e Lartë, duke pretenduar shkelje ligjore.
Kolegji Penal i Gjykatës së Lartë, në 11 korrik 2023, vendosi rikthimin e çështjes për shqyrtim në Gjykatën e Apelit të Posaçëm.
Gjyqtarët e Lartë arrin në konkluzionin se Apeli nuk duhej të vendoste mospranim të ankimit vetëm për shkak të kalimit të afateve proceduriale.
Për Kolegjin Penal të Gjykatës së Lartë, çështja duhet rikthyer në Apelin e Posaçëm, i cili duhet të shprehet për themelin e argumentave që ka paraqitur Ramazan Rraja në kërkesën e tij për lirimin nga qelia.
Pavarësisht se çështja e tij u rikthye në Apel, Ramazan Rraja do të vijojë të qëndrojë në burg, pasi ndaj tij janë dy masa sigurimi, një për pjesëmarrje në organizatë kriminale që ndërmori atentatin ndaj ish-prokurorit Arjan Ndoja dhe një për armëmbajtje pa leje.
