Teksa në kryesinë e Kuvendit po zhvillohej mbledhja e Këshillit të Mandateve dhe Imunitetit për kërkesën e SPAK ku kërkon autorizimi për arrestimin e deputetit të PS-së, Arben Ahmetaj, Gazment Bardhi i ka drejtuar disa pyetje avokatëve të ish-zv.kryeministrit.
Bardhi u ka kërkuar avokatëve të japin sqarime pse janë kundër kontrollit të pasurisë që nga viti 2004 për Ahmetajn dhe a ka qenë dhe ish-ministri Damian Gjiknuri në udhëtime me të në Vjenë.
“Nëse klienti juaj do ishte prezent, do bashkëpunonte dhe përballej me drejtësinë, mund të kishim qenë mirëkuptues për me shumë kohë për mbrojtje. Por klienti juaj ka ikur jashtë vendit ditën që është kërkuar arrestimi. Kritikuat prokurorinë pse e ka shtrirë hetimin duke nisur që në vitin 2004. Ky lloj hetimi i pasurisë së zyrtarëve duhet të bëhet për të gjithë politikanëve. Akuzat nuk kanë natyrë politike, por për korrupsion dhe abuzim me pushtetin. Pse jeni ju kundër kontrollit të pasurisë dhe shtrirjes se hetimit që nga 2004?
Keni ju prova për ligjshmërinë e kësaj pasurie? Pse ka gënjyer Ahmetaj për raportin me Mirel Mërtirin dhe Klodian Zoton? A rezulton që në udhëtime njëlloj si Ahmetaj me këta dy persona, ka qene edhe Damian Gjiknuri? A e konfirmoni ju këtë?” – mësohet se kanë qenë pyetjet e Bardhit për avokatët e Ahmetajt.
Ndërkohë, edhe deputetit Ervin Salianji është përplasur me avokatët e Ahmetajt, ku iu ka kërkuar që të përgjigjen nëse a mendojnë se klienti i tyre po sulmohet nga mazhoranca.
“Avokat, ju në fjalën tuaj thatë që duhet t’i ruhemi protagonizmit gjyqësor, thatë që ka gjuhë joprofesionale në relacion, që ka fyerje që prokuroria u soll si Gestapo etj… Ndërkohë duke i qëndruar mendimit që ne nuk jemi gjykatë dhe që garancia e imunitetit është garanci për sulmet politike po ju pyes pasi thatë që klienti juaj është vunerabël politikisht, mendoni që po sulmohet politikisht nga mazhoranca? Ne publik po qarkullon që personi nën hetim ju është pergjigjur prokurorise për disa pyetje se prokuroria duhet të pyesë Ramën për disa vendimmarje, keni autorizim ose info për ta qartësuar këtë?” – tha Salianji.
Gjithashtu, mësohet se avokati i Arben Ahmetajt, Ardian Visha në mbledhjen e Këshillit të Mandatave, ku SPAK kërkon arrestimin e ish-ministrit, ka deklaruar se nuk gjen drejtësi në SPAK. Ndërkohë deputetja socialiste Ermonela Felaj i është përgjigjur se çfarë ndikimi mund të kenë prokuroret e SPAK kur e kanë kaluar vetingun?
