Ditën e nesërme në orën 20:45 në stadiumin “Air Albania”, Partizani luan sfidën më të shtrenjtë sa u përket financave dhe një nga më të rëndësishmet sa i përket historisë së klubit në kompeticionin e Champions League.
Kjo është paraqitja e 11-të e Partizanit në këtë turne në të gjithë ekzistencën e vet dhe vetëm një herë ka arritur të kalojë raund, duke shkuar nga i dyti, në të tretin. Bëhet fjalë për sezonin 2016-2017 nën drejtimin e italianit Adolfo Sormani.
Të kuqtë këtë herë e nisin nga turi i parë dhe synimi është të kalojnë skuadrën e BATE Borisov, ekipi më me histori në Champions në vendin e vet. Por si i gjen dy ekipet kjo ndeshje milionere?
Skuadra e kuqe, ndryshe nga kundërshtari, vjen në këtë ndeshje me petkun e kampiones. Por pas këtij suksesi, festa nuk zgjati shumë, sepse drejtuesit nisën një dallgë divorcesh, duke u ndarë më gjithë stafin e skuadrës.
Në stol erdhi Zoran Zekiç, një strateg i futbollit kroat dhe një nga trajnerët me CV-në më të pasur që ka ardhur ndonjëherë në Shqipëri. Ai mori skuadrën në drejtim më 13 qershor, duke ardhur në këtë ndeshje të parë me më pak se një muaj në stolin e kuq.
Përveç stafit, edhe skuadra ka pësuar ndryshime. Në portë, Qirko është emëruar në vend të Rexhepit. Në mbrojtje është larguar Menish, ndërkohë që është rikuperuar Sembene.
Klubi e kërkoi me ngulm një qendërmbrojtës të nivelit të lartë, por nuk arriti ta ketë për këto ndeshje. Në mesfushë Matondo mungon, teksa është zëvendësuar me Adnard Mehmetin.
Gjithashtu, largimi i Engjëll Hotit u pasua nga afrimi i para pak ditëve, Gjelbrim Taipi. Në sulm e vetmja e re quhet Albers Keko. Për dy javë trajneri Zoran Zekiç e ka “shtrydhur” skuadrën në Pogradec, atje ku lojtarët kanë përjetuar disa nga stërvitjet më të forta në karrierë.
E megjithatë, për meritë të stafit të skuadrës, por edhe të fatit, deri më tani nuk ka pasur asnjë dëmtim muskulor. Skuadra ka zhvilluar dy ndeshje miqësore, ku ka arritur të fitojë me një gol të Alfred Mensah ndaj Strugës dhe u mposht me shifrat 2-1 nga Ballkani.
Gjatë gjithë kësaj kohe Zekiç e ka përgatitur skuadrën me hollësi rreth sjelljes që duhet të bëjë në fushë, duke studiuar edhe ndeshjet e BATE Borisovit.
