Presidenti Bajram Begaj ka dekretuar propozimet e kryeministrit Edi Rama për shkarkimin e Bledi Çucit dhe emërimin e Taulant Ballës në krye të Ministrisë së Brendshme.
Kryeministri Edi Rama vendosi të shkarkojë nga detyra Bledi Çuçin pas ngjarjes në Borizanë të Fushë-Krujës, ku anëtarë të fisit Rraja dhunuan me shkopinj dhe shkelma dy persona të tjerë dhe shkak u bë sherri për guroren.
Pas kësaj, shefi ekzekutiv ka propozuar emrin e Taulant Ballës për drejtimin e Ministrisë së Brendshme. Ndërkohë, kreu i shtetit Bajram Begaj tashmë dekretoi emrin e dërguar nga Rama.
Çuçi e mori detyrën e Ministrit të Brendshëm në Dhjetor 2020, duke zëvendësuar në këtë post Sandër Lleshajn. Pas shkarkimit, Çuçi falenderoi kryeministrin Rama dhe i uroi suksese në detyrën e re Taulant Ballës.
“Falënderoj kryeministrin Rama për besimin dhe mbështetjen që më ka dhënë këto dy vite e gjysmë në detyrën e vështirë të Ministrit të Brendshëm. Për mua ka qenë nder dhe përgjegjësi e madhe të ushtroja këtë funksion të lartë publik dhe shumë të rëndësishëm. Prej ditës së parë kur e mora atë detyrë e deri më sot kam punuar e shërbyer me integritet dhe bashkë me skuadrën e Ministrisë së Brendshme kemi adresuar shumë sfida që lidhen me sigurinë, rendin publik, emigracionin, gjendjen civile dhe pushtetin vendor. Një falënderim i veçantë shkon për të gjithë ata që ishin krah meje në këtë rrugëtim sfidues. Suksese Taulantit në sfidën e re, për të vijuar me reformat transformuese në këtë ministri e veçanërisht në Policinë e Shtetit”, u shpreh Cuçi në një reagim.
