Julian Alvarez përmbylli etapë ëndrrash në sezonin 2022- 2023, duke filluar nga suksesi me Argjentinën në Botërorin “Katar 2022”, e për të vijuar me triumfin e trefishtë te “qytetarët” brenda dhe jashtë kufijve anglezë.
Ndonëse ai vjen me karakteristikat e “pykës”, Pep Guardiola e ka përdorur me minutazh të limitiuar, teksa pozita e titulluar nuk diskutohet në balotazhin me Halandin, i cili mban të njëjtën rol në “Etihad Stadium”.
Për të gjetur pikë të përbashkëta mes Alvarezit dhe Bajernit ka menduar prestigjiozja gjermane “Bild’. Mediumi në fjalë cek se bordi i kampionëve të Bundesligës janë sy e veshë në operacionin “Kejn” dhe në rastin më të keq, pra dështimi i negociatave me presidentin Levi do t’i hapte udhë sulmit total në rastin e lojtarit të “albiçelësteve”.
OBJEKTIVAT KRYESORE- Që me mbylljen e sezonit të fundit, Herri Kejn dhe Viktor Osimhen u evidentuan si personazhet kryesore rreth mundësisë së zbarkimit në Mynih, por deri në këtë pikë, asnjëri prej tyre nuk ka bërë hapa konkrete, ndonëse me Herrin panorama mbart ngjyra më të ndezura.
Gjithsesi, presidenti i Totenhemit, Daniel Levi, njihet gjerësisht në Ishull si problematik kur u referohemi marrëveshjeve, mjafton të marrim shembullin kur Mançester Siti ishte i gatshëm të depozitonte 150 milionë euro në xhepat e londinezëve, por qëndrimi stoik i Levit rezultoi vendimtar, refuzim.
Fati i tillë përkon edhe në aksin Napoli-Mynih, me protagonist Viktor Osimhenin. Presidenti Aurelio de Laurentis nuk i hap derën e bisedimeve asnjë pale të interesuar për 24-vjeçarin nigerian nëse nuk prezantohet oferta e çmendur prej 180 milionë eurosh.
PLANI C- Bajerni njihet si ekipi që u beson talenteve, marrë në konsideratë rastin e Musialës, Komanit, apo Shvajnshtaigerit përpara disa vitesh. E njëjta linjë mund të aplikohet edhe te futbollisti me numër “19” nga gjiri i kampionëve të Premier Ligës.
Në vitin e parë nën urdhrat e Pep Guardiolës, 23-vjeçari numëroi 49 takime, e përkthyer me 17 gola dhe 5 asiste, ndonëse në shumicën e rasteve u përdor si “gomë rezervë”. Kontrata me Sitin i skadon në verën e 2028-ës, ndërsa “Transfermarkt” e vlerëson në kuotën e 60 milionë eurove, më se e përballueshme nga rekordmenët gjermanë.
