Bledi Çuçi ka falënderuar kryeministrin Edi Rama pasi ky i fundit e shkarkoi nga posti i Ministrit të Brendshëm.
Reagimin pas shkarkimit, ai e nis me këto fjalë: “Falënderoj kryeministrin Rama për besimin dhe mbështetjen që më ka dhënë këto dy vite e gjysmë në detyrën e vështirë të Ministrit të Brendshëm. Për mua ka qenë nder dhe përgjegjësi e madhe të ushtroja këtë funksion të lartë publik dhe shumë të rëndësishëm”.
Më tej, shprehet se “prej ditës së parë kur e mora atë detyrë e deri më sot kam punuar e shërbyer me integritet dhe bashkë me skuadrën e Ministrisë së Brendshme kemi adresuar shumë sfida që lidhen me sigurinë, rendin publik, emigracionin, gjendjen civile dhe pushtetin vendor”.
“Një falënderim i veçantë shkon për të gjithë ata që ishin krah meje në këtë rrugëtim sfidues”, vijon.
Reagimin e mbyll me një urim për pasaardhësin, Taulant Balla:
“Suksese Taulantit në sfidën e re, për të vijuar me reformat transformuese në këtë ministri e veçanërisht në Policinë e Shtetit”.
Shkarkimi i Çuçit vjen pas publikimit të pamjeve të dhunës shtazore të familjareve dhe vëllezërve të Rrahman Rrajës ndaj dy kushërinjve Maja dhe akuzave e hetimit të policisë për ti arrestuar.
