Kryeministri Edi Rama ka shkarkuar nga detyra e ministrit të Brendshëm Bledi Çuçin. Në këtë post ka zgjedhur Taulant Ballën.
Ndryshimet në kabinetin qeveritar i ka bërë me dije përmes një reagimi në Twitter, ku poston dokumentat që presin dekretin e Presidentit Bajram Begaj për shkarkimin e Çuçit si ministër i Brendshëm dhe emërimin në këtë post të Ballës, i cili është dhe kryetar i grupit parlamentar të PS-së.
Rama thotë të hënën do t’i dorëzojë zyrtarisht Presidentit të Republikës propozimet.
“Falenderoj ministrin Bledi Çuçi për punën e tij si gjithnjë korrekte edhe në këtë detyrë dhe uroj që ministri i ri i Punëve të Brendshme Taulant Balla, të çojë më tej përpjekjen tonë të palëkundur shtetndërtuese edhe në këtë drejtim”, shton kreu i qeverisë.
Lëvizja vjen pas publikimit të pamjeve të dhunës shtazore të familjareve dhe vëllezërve të Rrahman Rrajës ndaj dy kushërinjve Maja dhe akuzave e hetimit të policisë për ti arrestuar.
Më herët, zyra e shtypit e PS-së njoftoi edhe dorëheqjen e Rrahman Rrajës si deputetet i Partisë Socialiste.
Të hënën do t’i dorëzoj zyrtarisht Presidentit të Republikës propozimet e mëposhtme! Falenderoj ministrin Bledi Çuçi për punën e tij si gjithnjë korrekte edhe në këtë detyrë dhe uroj që ministri i ri i Punëve të Brendshme Taulant Balla, të çojë më tej përpjekjen tonë të… pic.twitter.com/A3GsfmhhmE
— Edi Rama (@ediramaal) July 8, 2023
Çuçi e mori detyrën e Ministrit të Brendshëm në Dhjetor 2020, duke zëvendësuar në këtë post Sandër Lleshajn.
Pas shkarkimit, Çuçi falenderoi kryeministrin Rama dhe i uroi suksese në detyrën e re Taulant Ballës.
“Falënderoj kryeministrin Rama për besimin dhe mbështetjen që më ka dhënë këto dy vite e gjysmë në detyrën e vështirë të Ministrit të Brendshëm. Për mua ka qenë nder dhe përgjegjësi e madhe të ushtroja këtë funksion të lartë publik dhe shumë të rëndësishëm. Prej ditës së parë kur e mora atë detyrë e deri më sot kam punuar e shërbyer me integritet dhe bashkë me skuadrën e Ministrisë së Brendshme kemi adresuar shumë sfida që lidhen me sigurinë, rendin publik, emigracionin, gjendjen civile dhe pushtetin vendor. Një falënderim i veçantë shkon për të gjithë ata që ishin krah meje në këtë rrugëtim sfidues. Suksese Taulantit në sfidën e re, për të vijuar me reformat transformuese në këtë ministri e veçanërisht në Policinë e Shtetit”, u shpreh Cuçi në një reagim.
