Ngjarja kriminale e ditëve të fundit në Krujë dhe vendimi pasues i deputetit Rrahman Rraja (PS) për të dhënë dorëheqje nga mandati parlamentar rikthejnë edhe njëherë rëndësinë e aplikimit integral dhe emergjent të standardeve të plota të dekriminalizimit dhe të integritetit nga partitë politike parlamentare. Qëllimi në një proces elektoral nuk është vetëm fitorja, por mbi të gjitha integriteti dhe legjitimiteti i procesit, shndërrimi i zgjedhjeve në zgjidhje, ku cilësia e produktit përfaqësues zë vend thelbësor.
Instituti i Studimeve Politike (ISP), si organizatë që monitoron dekriminalizimin, integritetin në politikë dhe jetën parlamentare, vlerëson se zyrtarë të zgjedhur ose të emëruar, që kanë rekorde negative në raport me ligjin, që rezultojnë më se njëherë se kanë përfshirje direkte ose indirekte në skandale dhe ngjarje të rënda, që hyjnë në parlament në disa mandate pa dhënë asnjë kontribut legjislativ aty, dhe që politikën e shohin si imunitet e privilegj dhe imunitetin si mekanizëm përfitues e abuzues me shtetin e së drejtës, lirinë dhe pronën qytetare, – vijojnë të jenë aktiv në partitë tona, në parlament, në bashkitë dhe jetën publike, ndonëse kanë qenë e janë modele të papajtueshme me standardet e integritetit, etikës dhe llogaridhënies.
Instituti i Studimeve Politike (ISP) vlerëson se, ndonëse partitë tona i pranuan publikisht dekriminalizimin, Kodin e Sjelljes dhe parimet e integritetit, ato i përdorin këto angazhime vetëm për të adresuar akuza për konsum politik ndaj palëve politike rivale, por ndërkohë refuzuan t’i aplikojnë brenda vetë strukturave të tyre të brendshme, në proceset e tyre të brendshme dhe në fazën e hartimit të listës së kandidatëve për deputetë apo kryetarë bashkish. Koncepti i parandalimit dhe verifikimit të hershëm u injorua, për pasojë, edhe 7 vjet pas miratimit të ligjit të dekriminalizimit, nuk janë arritur ende standardet e premtuara të integritetit dhe vazhdimisht vijojmë të kemi politikanë të përfshirë në skandale që detyrohen nga presioni publik të japin dorëheqje.
ISP falënderon median, shoqërinë civile dhe çdo zë publik që iu bashkua denoncimit të rastit të Krujës dhe nevojës jetike për ndarjen e politikës nga modeli i “të fortëve” të emëruar në parlament dhe në nivele të tjera vendimmarrëse e përfaqësuese.
ISP uron shërim të shpejtë viktimave të dhunës dhe apelon hetime shteruese për ngjarjen e fundit, përgjegjësi ligjore për të gjithë individët e përfshirë dhe zyrtarët që iu larguan detyrimeve të tyre ligjore.
ISP mirëpret dorëheqjen e deputetit nga mandati dhe apelon Partinë Socialiste dhe çdo parti tjetër parlamentare të heqin dorë nga alibia e përgjegjësisë individuale. Lidershipi i tyre të përballet me pasojat politike që pasjellin aleanca me informalitetit, skandalet apo rekordet negative të zyrtarëve të emëruar ose përzgjedhur prej tyre.
Politika ka vlerë kur ka brenda saj moralitet, integritet, besueshmëri, modesti, qytetari, reflektim nga gabimet, vizion dhe aftësi të ofrojë alternativa më të mira për vendin.
Koha për politikë të pastër dhe të përgjegjshme, me integritet dhe llogaridhënëse.
Instituti i Studimeve Politike (ISP)
