Socialisti Rrahman Rraja hoqi dorë ditën e sotme nga mandati i deputetit, pas pamjeve që tronditën opinionin publik ku familjarët e tij (përfshirë vëllezërit dhe djalin e tij) ushtruan dhunë brutale me shkopinj bejsbolli dhe shqelma ndaj dy kushërinjëve Maja, vetëm për shkak se këta të fundit kishin denoncuar dëmet që u shkaktonte gurorja e Rrajave ndaj banesave të tyre. Madje, Xhalal Rraja, vëllai i Rrahman Rrajës mbante në dorë dhe një armë zjarri pistoletë në momentin që ushtronte dhunën.
Por, dorëheqjen e Rrajës nga posti i deputetit e ka njoftuar vetëm zyra e Partisë Socialiste, përmes një deklarate të shpërndarë për mediat dhe të shkruar në vetë të parë.
Rrahman Rraja ka qenë një deputet që nuk i është ndjerë zëri kurrë në Kuvend dhe jo pak mbetën të habitur nga mënyra se si ishte shkruar ajo deklaratë, aq sa në rrjet filluan ironitë se ajo ishte shkruar nga vetë Endri Fuga, zëdhënësi i kryeministrit Edi Rama për mediat. Në deklaratë “Rraja” shkruante se ndihej i turpëruar si prind nga akti i djalit të tij, por duhet të theksuar se kjo nuk është hera e parë që si i biri, po ashtu dhe vëllezërit apo nipërinjtë e tij u ka dalë emri në ngjarje kriminale si dhunë, trafik droge apo edhe vrasje.
Por, ajo që ngre dyshime mbi deklaratën e tij se nuk është shkruar nga ai vetë, por nga zyrat e PS-së është edhe fakti se nëse i hedhim një sy profileve të tij në rrjetet sociale, nuk ka asnjë lloj deklarate për dorëheqjen nga mandati i deputetit. Pra, deri tani, për dorëheqjen e Rrajës ka folur vetëm PS, por ende jo ai publikisht.
Më poshtë deklarata e shpërndarë nga zyra e PS-së:
“Nuk kam fjale per ta shprehur sikletin karshi te gjithe atyre qe me kane besuar gjithe keto vite. Fatkeqesisht une deshtova si prind dhe ndjehem i turperuar publikisht nga femija im. Ju kerkoj ndjese shokeve dhe kolegeve te grupit parlamentar dhe deklaroj dorezimin e mandatit te deputetit dhe terheqjen time nga jeta politike. Ju kerkoj ndjese atyre qe me kane dhene voten prej vitit 2000 si kryetar komune dhe prej 2 mandatesh si deputet. Ju kerkoj ndjese viktimave te asaj dhune turperuese për familjen time. I bej thirrje djalit tim te dorezohet para drejtesise. Zoti me dhente force qe ta perballoj kete dhimbje te madhe dhe jete qe ta shlyej kete turp qe me la mbi shpatulla si gur im bir. Ne fund mirenjohje dhe ndjese edhe kryetarit te partise dhe kryeministrit, i cili nuk me kishte asnje borxh per kete shqetesim kaq te madh publik qe i shkaktova”,-shkruan Rrahman Rraja.
