Deputeti i Partisë Demokratike, Asllan Dogjani tha këtë të shtunë se shkarkimi i Bledi Çuçit si ministër i Brendshëm lidhet me ngjarjen e Fushë-Krujs me protagonistë Rrajat.
Në emisionin “Review” në Euronews Albania, Dogjani tha se Rama e ndërmori vendimin e shkarkimit për të larguar përgjegjësinë nga vetja si dhe të heq vëmendjen publike nga ngjarja.
“Largimin e ministrit unë e shikoj të lidhur me Edi Ramën, sa herë që Ramës i rrezikohet pushteti, për të shmangur përgjegjësinë e opinionit publik ai largon bashkëpunëtorët e tij. Kjo tregon se nuk i mban bashkëpunëtorët. E dyta ai e bën që opinion dhe media të mos merren me këtë ngjarje të rëndë por që të merren me largimin e ministrit të Brendshëm, edhe emërimin e ministrit të ri. Unë e vlerësoj një ngjarje të tmerrshme, pasi përcjell një panik dhe çon mesazhin se këtu fitohet vetëm me banda dhe rrezikohet çdo qytetar i Shqipërisë”, tha ai.
Dogjani shtoi se në Shqipëri vendosin bandat dhe mafia të cilat kontrollojnë territorin, ndaj shtoi se të gjithë qytetarët duhet të ndihen të kërcënuar.
“Kjo tregon që qytetarët shqiptarë janë të gjithë të kërcënuar dhe nuk është problem i vetëm kësaj familjeje, por i gjithë shqiptarëve. Mafia kjo është, mafia kontrollon territorin, aty keni pikërisht një grup të caktuar që kontrollon territorin”, tha Dogjani.
