Kryeministri Edi Rama, në një konferencë për mediat krah Presidentit Aleksandër Vuçiç në Beograd, paralajmëroi se situata në veriun e Kosovës mund të përshkallëzohet nëse nuk zgjidhet konflikti.
“Do të përsëris se e vetmja rrugë përpara është rruga e dialogut dhe marrëveshjes bazuar në planin franko-gjerman. Askush nuk duhet të nënvlerësojë rrezikun e përshkallëzimit deri në atë pikë sa të gjendemi në një situatë ku lëvizjet e armatosura të fillojnë të bëjnë diçka që nuk duhet të lejojmë të ndodhë, që do të na çojë në një situatë të krahasueshme me Donbass-in”, tha Rama duke iu përgjigjur një pyetjeje nga gazetarët lidhur me situatën në veri të Kosovës. Paralajmërim që kreu i qeverisë shqiptare e ka bërë edhe në deklaratat e mëparshme.
Vuçiç ndërkohë tha se “pala serbe tashmë ka përmbushur gjithçka” dhe ai është i gatshëm të takohet me Albin Kurtin në çdo moment, ndërsa nuk i kurseu ironitë për liderin e Kosovës.
“Më pyesni se kur do të shoh Albin Kurtin, por unë nuk e di as ata që janë më afër tij se kur do ta shohin. Unë nuk jam aq optimist se sa Edi. Sepse ky di të flasë më mirë se unë me Brukselin. Mos na pyesni mua dhe Edin për Kosovën në sytë e njërit -tjetrit”, deklaroi ai.
Në fund të konferencës, kryeministri i Shqipërisë tha se propozimin e tij për Asosacionin ia kishte dërguar Gjermanisë dhe Francës, të cilat siç deklaroi janë “kumbarët” e marrëveshjen mes Serbisë dhe Kosovës.
Vuçiç nga ana tjetër u shpreh se nuk e la lexuar propozimin e Ramës, që në një farë mënyre e shpërfilli kur deklaroi se vetëm Serbia ka të drejtë bëjë një propozim të tillë.
“Në Serbi njerëzit i zgjedhin vetë kumbarët e tyre”, u shpreh ai, duke theksuar më tej “vetëm Serbia mund të propozojë Statutin e Asosacionit, sepse kështu është sipas Marrëveshjes së Brukselit”.
Takimi i Ramës në Beograd ishte i fundit i “turit të tij ballkanik” tre muaj para samitit të Berlinit në Tiranë. Ai u takua me liderët e shteteve ballkanike në dy ditë përveç kryeministrit të Kosovës Albin Kurti, i cili e rezuzoi takimin me Ramën.
