Kryetari i PD-së, Sali Berisha ka dënuar dhunën shtazore të ushtruar nga anëtarë të fisit Rraja një ditë më parë, ndaj dy kushërinjve Maja.
Në një postim në rrjetet sociale, Berisha shprehet se Rraja janë një bandë qeveritare.
Më tej, ai paralajmëron se “drejtësia vonon, por nuk harron krimet tuaja të shëmtuara”.
Reagimi
Në një postimin në FB Berisha shkruan:
“Dhunë shtazore në Borizanë të Krujës e Xhelal dhe Flamur Rrajës, vëllezërve të deputetit Rrahman Rraja ndaj qytetarëve të pafajshëm Bilbil dhe Jashar Maja.
Të dashur miq,
Dy vëllezërit e deputetit të PS, Rrahman Rraja, Xhelal e Flamur Raja, dhe djali i këtij të fundit, kanë rrahur shtazërisht me shkopa bejsbolli dhe kërcënojnë me pistoletë qytetarët e pafajshëm, Bilbil dhe Jashar Maja, kryetar i grupseksionit të Partisë Demokratike në Borizanë”.
Më tej, shton:
“Ky akt kriminal i fisit Rraja ka ardhur pas ankimit të vëllezërve Maja se atyre u ishte dëmtuar shtëpia nga shpërthimet në guroren që shfrytëzohej nga Rrajat. Duke shprehur solidaritetin e plotë të Partisë Demokratike, Bilbil dhe Jashar Majas, Partia Demokratike dënon me ashpërsinë më të madhe krimin e shëmtuar të bandës qeveritare Rraja dhe iu rikujton këtyre kriminelëve se drejtësia vonon, por nuk harron krimet tuaja të shëmtuara”.
