Gjykata e Durrësit ka mbyllur gjykimin ndaj italianit Ferdinando Muollo, i cili akuzohet për pastrim parash.
Gjykata e ka dënuar Muollon me 6 vite burgim, në mungesë pasi ky i fundit ndodhet në arrati. Gjithashtu Muollos do ti konfiskohet edhe pasuria në Durrës, më konkretisht: 5 apartamente, 7 garazhe, 1 automjet tip “Daimler Chrysler” dhe 1 llogari bankare me vlerë të ulët në euro.
Ndërkohë, dënimin prej 6 vitesh burg të dhënë nga gjykata e Durrësit, Ferdinando Muollo do e vuajë në Itali, atje ku është dënuar për rolin si porositës dhe financues në vrasjen e ortakut të tij, Salvatore Ridosso.
Hetimet në Shqipëri nisën pas letërporosisë së autoriteteve italiane për të hetuar veprimtarinë ekonomiko-financiare të Muollos në vendin tonë, në kuadër të procesit gjyqësor që po zhvillohej ndaj tij në Itali.