Ish-ministri i Mjedisit Lefter Koka, në dëshminë e dhënë nga seanca gjyqësore në GJKKO për inceneratorin e Elbsanit, akuzoi kreun e PL-së Ilir Meta për burgosjen e tij.
“Kjo është një situatë e krijuar nga Presidenti me fallxhoren e tij, i cili duke ndenjur mehaneve, shprehet do ta fus në burg”, raportohet të ketë thënë Koka në sallën gjyqit.
Ai është vetëshpallur i pafajshëm, ndërsa është shprehur se ka shërbyer me devotshmëri gjatë detyrës si ministër.
“Një e vërtetë e thënë përgjysmë është e pavërtetë. Prokuroria u bazua tek kallëzimi LSI dhe për 2 vite nuk më mori në pyetje asnjëherë. Unë si ministër, Sekretari përgjithshëm dhe Komisioni kemi zbatuar me përpikëri ligjin. Bëmë punën më të mirë dhe shërbyem me devotshmëri. Eshtë kohë e vështirë që kërkon burra e burrni, unë si kam borxh askujt ta paguaj me lirinë time! Akuza e prokurorisë është idiote! Kam hyrë në politikë si biznesmen dhe s`më bëri politika biznesmen. Po kthehemi 45 vite para në proceset e stisura të sistemit komunist”, tha Koka mes të tjerash.
“Është një alarm jo vetëm për mua por për të gjithë shoqërinë. Ky proces është i manipuluar fund e krye, besoj se e vërteta do të triumfojë. Nuk ekziston asnjë kontakt ose njohje me pronarët e inceneratorëve, ato nuk i solla unë por erdhën si propozim nga bota e biznesit. Prokurori devijoi hetimet dhe fraksionojë dosjen për të mos zbuluar të vërtetën. Drejtësia më herët sesa vonë do të dalë. Intriga e këtij procesi dashakeqës do të dalë dhe uroj të shërbejë për konsolidimin e mëtejshëm të reformës në drejtësi. Prokurori fshehu 40 fashikuj hetimor ku gjenden provat për pafajësinë time. Më janë vënë në dispozicion nga gjykata 1 javë më parë. Akuza pësoi mutacione për ti qëndruar besnike kallëzimit të LSI. Kurrë nuk i kam futur dorën në xhep dikujt”, shtoi ai.
I pafajshëm gjatë seancës së sotme, ku ishte radha e mbrojtjes së të pandehurve për tu shprehur, u vetëshpall edhe Alqi Bllako.
Më herët, SPAK ka kërkuar 10 vite burg (6 vite e 8 muaj prej gjykimit të shkurtuar) për Lefter Kokën.
Sipas SPAK Lefter Koka, në cilësinë e ish Ministrit të Mjedisit, ka përfituar rreth mbi 308 mln lekë nga shuma monetare që janë paguar nga shoqëritë “Albtek Energy” sh.p.k dhe “Integrated Technology Services” sh.p.k. Prokuroria vblerëson se kjo përbën një përfitim material të parregullt, që është marrë në këmbim të favorizimit të padrejtë të shoqërisë “Albtek Energy” sh.p.k në zhvillimin e procedurës së dhënies së koncesionit dhe në lidhjen e kontratës së koncesionit me objekt “Ndërtimin dhe administrimin e impiantit të trajtimit të mbetjeve urbane të Qarkut Elbasan, për prodhimin e energjisë”.
Ish-ministri është i pandehur edhe për inceneratorin e Fierit. Për këtë çështje, SPAK ka kërkuar dënimin e tij me 10 vite burgim (6.8 vite me gjykim të shkurtuar).
