Pajisjet elektronike të sekuestrua nga Policia e Shtetit, me urdhër të SPAK, gjatë aksionit të 20 Qershorit në kampin e muxhahedinëve (MEK) në Manzë të Durrësit i janë dorëzuar Iranit.
Këto janë dyshimet që ngre agjensia shtetërore e lajmeve IRNA, duke iu referuar një zyrtari iranian. Në artikull thuhet se Sepehr Khalaji, kreu i këshillit të informacionit të qeverisë iraniane, tha në një postim në Twitter të hënën se “një pjesë e disqeve dhe rasteve” kishin mbërritur në Iran.
Ai shtoi se ekspertët iranianë ishin të angazhuar në rikuperimin e të dhënave dhe identifikimin e agjentëve dhe qelizave sabotuese të grupit terrorist. “Rezultatet e deritanishme janë premtuese,” shtoi ai.
MEK kërkon sqarime nga ana e Shqipërisë dhe e Shteteve të Bashkuara të Amerikës, pasi sipas tyre, nëse kjo gjë është e vërtetë, do të përbënte një katastrofë humanitare dhe një shkelje e tmerrshme e të drejtave të njeriut
Më 20 qershor, forcat e policisë shqiptare hynë në kampin e MEK-ut në Manzë të Durrësit, duke çuar në përleshje intensive me banorët. Autoritetet konfiskuan 150 pajisje kompjuterike, nga ku dyshohet se është bërë sulmi kibenretik drejt Iranit. Më shumë se një javë më vonë, policia në Shqipëri hyri përsëri në kampin Ashraf-3 dhe forcat e sigurisë u vendosën në hyrje të kampit dhe kontrolluan të gjitha automjetet që dilnin nga vendi.
Në një intervistë për revistën gjermane “Der Spiegel” të premten, kryeministri i Shqipërisë Edi Rama tha gjithashtu se anëtarët e MEK-ut duhet të largohen nga vendi nëse grupi dëshiron të përdorë tokën shqiptare për të luftuar kundër Iranit.
Që nga viti 2016, Shqipëria ka pritur anëtarë të MEK-ut, pasi u dëbuan nga Iraku, ku ata ishin strehuar dhe armatosur nga ish-diktatori irakian Saddam Hussein për të kryer sulme kundër Iranit.
