Kreu i Partisë Demokratike, Sali Berisha ka hedhur akuza të drejtpërdrejta nga kryebashkiakut të Tiranës Erion Veliajn të cilin e bëri përgjegjës për situatën kaotike në të cilën ndodhet kryeqyteti sa herë që ka reshje shiu.
Lagje të përmbytura dhe rrugë të pashtruara, kjo është infrastruktura e shkatërruar që përballen çdo ditë qytetarët në kryeqytet.
Berisha thotë se ndërtimet pa kriter dhe kanalizimet si mos më keq për shkak të betonizimit kanë sjellë një situatë kaotike në rrugët e Tiranës.
“Miq, Tirana e Lal Betonit përmbytet në çdo stinë të vitit. Kryeqyteti i betonit, ndërtimeve pa kriter, kanalizimeve të shtruara si mos më keq, mungesës së hapësirave të gjelbërta dhe kanaleve kulluese, vihet në vështirësi të mëdha pikërisht nga keqmenaxhimi, vjedhjet dhe korrupsioni.
Këto pamje janë pasqyrë e pangopësisë së Veliajt dhe shefit të tij, që shkatërrojnë dhe nuk ndërtojnë. Ata vënë intetesin e tyre të parin, dhe kur Tirana përmbytet, fajin e ka moti jo Rama dhe Erion Betoni”, shkruan Sali Berisha, teksa poston videon e përmbytjes në Tiranë.
- Situata e rëndë çdo ditë në Tiranë
Në fakt situata e rënduar e trafikut është e njëjtë çdo ditë në Tiranë ku qytetarët përballen me situatën kaotike, rrugët e ngushtuara dhe betonizimin. Përgjegjës për situatën kaotike në kryeqytet është kryebashkiaku socialist Erion Veliaj i cili e ka kthyer Tiranën në një kantier të madh ndërtimi, fluks makinash dhe ajër i ndotur.
Fatkeqësisht, dita e një qytetari në Tiranë nis me stres e ankth, ku të gjithë vrapojnë për të arritur në orar në destinacionet e tyre, disa të tjerë duhet të dalin një orë para nga shtëpia për të kapur autobusin, pasi metropoli zhytet në kaos trafiku që në orët e para të mëngjesit.
Trafiku rëndohet edhe në orët e pasdites, kur qytetarët kthehen nga puna. Një dite të lodhshme, i shtohet edhe trafiku i rënduar vetëm sepse kryebashkiaku nuk tregon përgjegjshmëri ndaj qytetarëve të tij.
