Kreu i Drejtorisë së Përgjithshme të Shërbimeve të Transportit rrugor, Bledi Gonxhja, u bën apel drejtuesve të mjeteve motorike të mos qarkullojnë pa kolaudim, pa paguar siguracionin dhe pa shlyer taksat.
Në një reagim në rrjetet sociale, Gonxhja bënë të ditur se po zhvillohen kontrolle intensive në Tiranë përmes sistemeve inteligjente të skanimit të targave, çka ndihmon në konstatimin e mjeteve motorike në të cilat lëvizja bëhet pa kolaudim, pa siguracionin apo pa paguar taksat.
“Vetëm brenda një turni ditor monitorues në Tiranë (Qendër-Kinostudio, Unaza e Madhe, Unaza e Vogël, Komuna e Parisit, Selitë), nga 3362 targa të skanuara, Makina Inteligjente e DPSHTTR ka zbuluar 392 targa të mjeteve debitore, në qarkullim me taksa të papaguara, ose 11.6 % me detyrime të pashlyera”, thekson Gonxhja.
Ai bëri me dije po ashtu se kontrollet po zhvillohen me sisteme smart, për automatizim të monitorimit rrugor në lëvizje me teknologjinë më të re amerikane.
“Parregullsitë në dokumentacionin e mjeteve rrugore sjellin pasoja të rënda për sigurinë publike, mjete të pakontrolluara teknikisht, evazion fiskal, pabarazi, minim të sigurisë rrugore, mosmbulim dëmesh nga aksidentet, dëm ekonomik e varfërim të arkës vendore e qendrore, paligjshmëri e shmangie detyrimesh!”, sqaron më tej Goxhe.
