Kreu i PD-së, Sali Berisha ka reaguar në lidhje me aksionin e sotëm të Policisë së Shtetit në kampin e muxhahedinëve në Manzë të Durrësit, për kontrollin të gjithë mjetet që dalin nga kampi.
Në një postim në rrjetet sociale, Berisha e konsideron si terror policeskt ndaj refugjatëve të MEK, teksa dënon aktin dhe bën thirrje që të ndalohet. Sipas tij, kryeministri Edi Rama po shkel me urdhër të Teheranit, Konventën Europiane të të Drejtave të Njeriut dhe Konventën e OKB për refugjatët.
Berisha i bën thirrje Këshillit të Europës dhe Organizatës të Kombeve të Bashkuara të ndërhyj urgjentisht
“Stop terrorit policesk ndaj refugjatëve të MEK.
Të dashur miq, mediat informojnë se vazhdon presioni policor ndaj Kampit të Muxhahedinëve në Manzë . Dënoj me ashpërsinë më të madhe shkeljen me urdhër të Teheranit nga Edi Rama të Konventës Europiane të të Drejtave të Njeriut dhe Konventës së OKB për refugjatët.
I bëjë thirrje Këshillit të Europës, Organizatës të Kombeve të Bashkuara të ndërhyj urgjentisht kundër këtyre reprezaljeve, presioneve e terrorit psikologjik ndaj refugjatëve të MEK në kampin e Lirisë në Manzë dhe të kërkojë zbatimin nga qeveria shqiptare të të gjitha detyrimeve që rrjedhin nga Karta Europiane e të Drejtave të Njeriut nga Konventa Ndërkombëtare e OKB për refugjatët. #sb” – shkruan Berisha.
Mëngjesin e kësaj të enjteje, policia ka zbarkuar sërish në kampin MEK në Manëz të Durrësit. Sipas burimeve, forca e policisë janë vendosur në hyrje të kampit Ashraf 3 dhe kontrollojnë të gjithë mjetet që dalin nga kampi.
Ndërkohë, kujtojmë se një javë më parë në këtë kamp për shkak të kontrolleve të ushtruara nga Policia me urdhër të SPAK pati tensione, ku përfaqësues të MEK akuzonin efektivët e policisë për dhunë.
Pjesëtarët e opozitës iraniane akuzuan policinë se i mori jetën një anëtari të tyre përmes gazit lotsjellës, ndërkohë që shkaqet e vdekjes së personit në fjalë ende nuk janë përcaktuar nga ekspertiza.
Sipas SPAK, dyshohet se organizata “MEK”, e vendosur në Manzë, ka kryer sulme kibernetike ndaj Republikës Islamike të Iranit në disa periudha të ndryshme kohore, si edhe ndaj institucioneve në shtetin iranian
