Një 62-vjecar ka rënë në prangat e Policisë së Vlorës,pasi është kapur duke ndërtuar në bregun e detit.
Sipas njoftimit të policisë, i arrestuari kishte ngritur dy objekte druri, pa lejen përkatëse të institucioneve përgjegjëse në plazhin e Jonufrit.
Autoritetet kanë nisur menjëherë verifikimet për këtë rast për të bërë të mundur zbulimin e personave të tjerë, të cilët kanë bashkëpunuar me të arrestuarin.
“Si rezultat i kontrolleve dhe i verifikimeve në terren, me qëllim parandalimin, konstatimin dhe goditjen e paligjshmërive në fushën e ndërtimeve, veçanërisht të atyre në zonat urbane dhe në ato bregdetare, shërbimet e Komisariatit të Policisë Vlorë, bazuar në informacionet e siguruara në rrugë policore, kanë goditur një tjetër rast të paligjshmërive në këtë fushë.
Gjatë kontrolleve u konstatua se shtetasi M. V. kishte ngritur 2 objekte prej druri, në funksion të ndërtimit pa lejen e organeve kompetente, të një lokali në plazhin e Jonufrit.
Në vijim të veprimeve procedurale për këtë rast, specialistët për Hetimin e Krimeve të Komisariatit të Policisë Vlorë arrestuan shtetasin M. V., 62 vjeç, banues në Vlorë, për veprën penale “Ndërtimi i paligjshëm””,– njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm, për veprime të mëtejshme.
