Nga Boldnews.al
Disa muaj më parë, BoldNews.al publikoi një investigim për “luftën” e tenderit të lavdërisë në Qendrën Spitalore “Nënë Tereza”. Paralelisht me këtë tender u hap edhe tenderi i “supës së spitalit”. Të dyja procedura që po shkojnë vetëm në një dorë, te firmat e njerëzve të afërt të Nikon Jakës. Nëse tenderi i “supës” u anulua me qëllim që të rritej vlera, tenderi i lavanderisë njohu edhe fituesin. Në fakt, nuk është një emër surprizë, por firma që operon prej vitesh në këtë spital, e cila ka marrë edhe qindarkat.
Sipas dokumenteve që disponon redaksia jonë, në tenderin 10 milionë euro ka marrë pjesë vetëm firma “AGS”, ku administratore është znj. Alma Tafani, bashkëshortja e z. Nikolin Jaka. Kjo firmë ka ofruar 99 % të fondit limit, teksa ne shkruam para disa javësh se gjithçka ishte paracaktuar. Ose më saktë, institucionet po “luftonin” se kush do bënte letrat për t’ia dhënë tenderin firmës që vijon të operojë prej vitesh në QSUT, për të cilën ka pasur dyshime të mëdha se është favorizuar.
Dokumenti i mësipërm është publikuar në datën 22 qershor 2023 në Agjencinë e Prokurimit Publik. Është shpallja e fituesit të tenderit me objekt “shërbim lavanderie për Qendrën Spitalore Universitare Nënë Tereza”, me afat të marrëveshjes kuadër 48 (dyzet e tetë) muaj dhe me fond të marrëveshjes kuadër 1,084,945,722 lekë pa TVSH.
Në këtë procedurë ka marrë pjesë vetëm firma “A G S” SHPK me një vlerë 1,083,886,500 lekë. Pra, shumë afër fondit limit. Diferenca mes fondit dhe ofertës është vetëm disa lekë “xhepi”, çka do të thotë se fituesi ka marrë edhe qindarkat e fundit.
“Luftë” për lavanderinë e QSUT-së, hapen paralelisht 2 tendera me vlerë 12 mln euro!
Denoncimi i BoldNews.al për tenderin e majmë të pastrimit të QSUT-së
Disa javë më parë, BoldNews.al publikoi një investigim për tenderat e lavanderisë në QSUT. Në atë kohë, ishin hapur paralelisht dy tendera, ku vlera e të dyve ishte plot 12 milionë euro.
“Një shumë marramendëse, duke qenë se bëhet fjalë për një nga procedurat e mëparshme që ka shkuar edhe në SPAK kohët e fundit, por që deri më tani nuk ka asnjë informacion për mbarëvajtjen e këtij procedimi. Megjithatë, ky hetim nuk e ka penguar drejtorinë e QSUT-së apo edhe Agjencinë Shtetërore të Prokurimeve të Përqendruara të hapin dy tendera paralelisht, duke “luftuar” se kush do t’i bëjë këto procedura” shkruante BoldNeës.al. QSUT hapi tenderin emergjent 2.2 milionë euro, ndërkohë tenderin e madh (që shkruam më sipër) kontraktues ishte Agjencia Shtetërore e Prokurimeve të Përqendruara, pra një institucion që kontrollohet nga Kryeministria dhe jo nga Ministria e Shëndetësisë, duke u hequr shuma të mëdha prokurimi. “Mësohet se procedurat janë gati dhe gjatë këtyre javëve do të hapen edhe zarfet, për të bërë disa ndere, pasi me kaq shumë fond, ka për të gjithë para’” shkruante BoldNews.al.
