Policia e Tiranës ka vendosur një shpërblim prej 5 mijë eurosh për këdo që jep një informacion të vlefshëm për kapjen e autorit të grabitjes së regjistruar mëngjesin e kësaj të shtune në një pikë për transferta parash dhe këmbimi valutor në zonën e Astirit.
Autori i maskuar dhe nën kërcënimin e armës dyshohet se ka marrë një shumë parash prej 40 mijë euro. Policia e Tiranës ka vendosur numrin e telefonit 0694110415, për këdo person që ka informacion për autorin, teksa garanton anonimatin e plotë të çdo telefonuesi.
Njoftimi:
Në funksion të hetimeve për zbardhjen e ngjarjes së ndodhur mëngjesin e sotëm, ku një shtetas është futur në një pikë për transferta parash dhe këmbimi valutor në Unazë të Re, dhe nën kërcënimin e një arme zjarri ka marrë një shumë parash dhe është larguar me biçikletë, me qëllim identifikimin dhe kapjen e autorit të dyshuar, Drejtoria Vendore e Policisë Tiranë vë në dispozicion pamjet filmike të ngjarjes.
DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e autorit.
Drejtoria Vendore e Policisë Tiranë vendos në dispozicion të qytetarëve, numrin e telefonit 0694110415, duke garantuar anonimatin e plotë të çdo telefonuesi.
