Gazment Bardhi, Sekretar i Përgjithshëm në PD e vulës, shprehet se tensionet që kanë përfshirë këtë pjesë të opozitës në javët e fundit, nuk i shërbejnë askujt.
Në emisionin” Kontrast”, Bardhi ripërsëriti qëndrimin se mbledhja e Këshillit Kombëtar ishte jo ligjore, pasi iu hoqën kompetencat si Sekretar i Përgjithshëm i partisë.
“Këshilli ka qenë një ndër kërkesat e mia. U refuzua dhe më pas u pranua. Më pas pashë që në mënyrë anti statutore, i gjithë organizimi i mbledhjes, që nga njoftimet etj që janë kompetencat e Sekretarit të Përgjithshëm, i kishin hequr dhe ua kishin dhënë 3 zyrtarëve që s’kanë lidhje me organizimin e Këshillit. Dhe kjo e bënte mbledhjen jo ligjore. Nuk e kuptoj se kujt i intereson ky tension, por ajo që pashë dje ishte shqetësuese. Nëse ne heqim ata që mendojnë ndryshe, na bën parti qesharake, personale. Unë gjykoja që ne ishim ndarë nga ky model. Unë nuk sillem dot njëlloj siç është modeli që kam kritikuar në 1 vit e gjysmë. Ky ishte moment historik për partinë”, tha Bardhi.
I pyetur për rikthimin e Bashës në krye të PD-së, Bardhi tha se nuk merret me emra të përveçëm. Ai tha se është i shqetësuar që PD të copëtohet edhe më tej.
“Beteja s’ka të bëjë me emra të përveçëm. Unë mendoja se do duhet ta linim pas sepse ishte metodë që na ndante e përçante. Partia vazhdon të copëtohet edhe më tej”, deklaroi Bardhi.
Ai shtoi se pse nuk e kishte komentuar vendimin e Këshillit që në momentin kur doli, madje parashikoi rrënimin e partisë nëse gjërat vijojnë kështu.
“Doja ta besoja që ishte lajthitje ai projekt i PD që ishte i paligjshëm. S’e kam fryrë përçarjen, madje apeloj të kenë maturi dhe reflektim. Kështu siç po shkojnë gjërat, Rama merr 100 mandate ndërsa opozita zero”, thotë Bardhi.
