Kryetari i Partisë Demokratike, Sali Berisha ka zhvilluar, këtë të Martë një takim me dy personazhe të historisë monarkike të Europës, dukën Michael von Habsburg-Lothringen dhe Dukeshën bashkeshorten, Christiana von Habsburg-Lothringen, pasardhës të familjes së shquar mbretërore të Habsburgëve.
Përmes një postimi në rrjete sociale, Berisha ka ndarë detaje nga takimi, teksa shkruan se në qendër të bisedimeve ishte roli i Hungarisë dhe Austrisë në proceset e demokratizimit të vendit pas rënies së komunizmit.
Ndër të tjera Berisha shkruan se u diskutua për vlerat e familjes në Shqipëri, ndërsa ka ndarë edhe foto nga takimi.
Deklarata e plotë e kreut të PD-së, Sali Berisha:
Sot pata kënaqësinë e veçantë të prisja në një takim miqësor dy personazhe të historisë monarkike të Europës, dukën Michael von Habsburg-Lothringen dhe Dukeshën bashkeshorten, Christiana von Habsburg-Lothringen, pasardhës të familjes së shquar mbretërore të Habsburgëve.
Ndava me ta, në një bisedë të ngrohtë, faktin se Shqipëria ka kujtime historike të shkëlqyera nga Habsburgët dhe Perandoria Austro-Hungareze, duke theksuar rolin e tyre kryesor në pavarësinë e Shqipërisë.
Lidhjet me familjen e madhe të Habsburgëve, personalisht si kryetar shteti dhe kryeministër, i kam zhvilluar nëpërmjet një tjetër pasardhësi, Otto von Habsburg, një anëtar i Parlamentit Europian nga partia gjermane CSU.
Vlerësova rolin e Hungarisë dhe Austrisë edhe në proceset e demokratizimit të vendit pas rënies së komunizmit.
Me Dukën dhe Dukeshën, të ftuar të Aleancës për Familjen dhe pastorit Akil Pano, shkëmbyem mendime edhe për zvetënimin e vlerave të familjes, nën një sulm të vazhdueshëm nga e majta ekstreme botërore, një kombinim i së majtës amerikane sorosiane dhe së majtës komuniste europiane.
Theksova mbështetjen time për mbrojtjen e vlerave të familjes edhe në Shqipëri, të cënura vitet e fundit nga qeveria e Ramës, që e ka kthyer vendin në një protektorat të George Sorosit, proponet të një familjeje me Prind 1 dhe Prind 2. Biseda ishte miqësore.
