Seanca për Parkun Kombëtar të Butrintit, e cila ishte parashikuar të mbahej ditën e sotme në Gjykatën Kushtetuese, është shtyrë.
Mësohet se gjykata ka kërkuar autorizim nga 36 deputetët, firmëtarë të PD.
Seanca ishte parashikuar të mbahej ditën e sotme, pas një padie të bërë nga një grup deputetësh të opozitës, të cilët janë kundër dhënies me koncesion të kësaj trashëgimie kulturore.
Pas daljes nga seanca deputetja e PD-së, Ina Zhupa, tha se Gjykata çmoi se si deputete përfaqësuese bashkë me avokatin nuk ishin të legjitimuar për të përfaqësuar 36 deputetët firmëtarë.
Zhupa paralajmëroi se seanca e radhës do të mbahet në 11 korrik ora 10:00.
“Palët e përfaqësuara në Gjykatë ishim të gjithë, pavarësisht se niveli i përfaqësimit të Këshillit të Ministrave dhe Fondacionit nuk ishte në nivelin që prisja.
Ajo që çmoi gjykata është që unë si deputete përfaqësues bashkë me avokatin nuk ishim të legjitimuar për të përfaqësuar 36 deputetët firmëtarë. Këtu ka një të pavërtetë sepse unë i jam drejtuar Gjykatës Kushtetuese me emrin tim personal me 7 kërkesa të tjera dhe më kishin njohur si subjekt të legjitimuar për të përfaqësuar deputetët.
Ata kanë vendosur që prej çështjes për ndërtimet pa leje një standard të ri. Unë i shtrova Gjykatës Kushtetuese dhe pyetjen se çfarë bëhet sepse 36 deputetë kanë firmosur dhe 5 kanë lënë mandatet.
Gjykata Kushtetuese vlerësoi që mjaftojnë 31 deputetët që janë firmëtarë dhe nuk ka nevojë për të shtuar firmat e atyre që zëvendësojnë deputetët në mandate.
Seanca e radhës u la në datën 11 korrik në orën 10:00. Besojmë se nuk do të ketë pengesa të tilla atë ditë, por do të futemi direkt në thelbin e çështjes.
Ne ishim përgatitur për sot, kishim kërkesa për Gjykatën, që do i parashtrojmë në seancën e radhës”, u shpreh Zhupa.
