Ajo që ndodhi me dy provimet e para të maturës së këtij viti, u përsërit edhe këtë të Martë. Pak pas nisjes së testimit, teza e Matematikës është publikuar online.
Në 10:00 nisi provimi, ndërsa rreth 20 minuta më pas, në rrjetet sociale nisi publikimi i varianteve A dhe B të tezave.
E njëjta gjë ndodhi edhe me dy provimet e para, atë të Gjuhës së Huaj që u zhvillua më 1 Qershor si dhe Gjuhë-Letërsisë që u krye më 7 Qershor.
Para sezonit të testimeve, Ministrja e Arsimit Evis Kushi ka deklaruar në mënyrë të përsëritur marrjen e masave si organizimi i provimeve në salla të mëdha, në mënyrë që “të ketë transparencë të ketë meritokraci, dhe monitorimi i procesit të provimeve të jetë sa më efikas”.
Ndërsa pas publikimit të tezave teka maturantët testoheshin, ajo u rrek të minimizonte ndikimin. Sipas ministres, përderisa teza nuk ka dalë përpara se të nisë testimi, kjo nuk cënon procesin e vlerësimit. Ministrja e Arsimit akuzoi se personat që fshihen pas këtyre rrjedhjeve janë të njëjtët, dhe ata veprojnë me qëllimin e cënimit të procesit të testimeve, por që sipas saj, nuk ia kanë arritur.
Kështu shpreh pas publikimit online të tezës së provimit të parë dhe një qëndrim të ngjashëm përsëriti kur rrodhi edhe teza e Gjuhë-Letërsisë.
“Garantojmë që nuk ka asnjë element që të dyshojmë që teza të zgjidhura jashtë kanë hyrë brenda dhe kanë favorizuar një apo dy maturantë, për këtë ne japim garanci. Nuk na vjen mirë që del testi. Dyshimi ynë është që ka njerëz që janë të investuar posaçërisht për këtë qëllim sepse janë gjithnjë të njëjtët që nxjerrin testin dhe nuk bashkëpunojmë me ne për të identifikuar personat që kanë shkelur rregulloren”, tha Kushi.
Fakt është që publikimi online i tezave teksa maturantët testohen është kthyer në një traditë që nxjerr në pah çdo vit pafuqinë e autoriteteve të linjës për ta ndaluar. Ekspertë të arsimit ndërkohë, e cilësojnë fenomenin një skandal.
