Ministria e Arsimit dhe institucionet nën varësi kanë dështuar në sigurimin e një ambienti të barabartë testimi për maturantët e këtij viti.
Këtë të Enjte, rreth 30 mijë maturantë (sipas llogaritjeve të Ministrisë së Arsimit) iu nënshtruar provimit të parë të Maturës Shtetërore për këtë vit, atij të gjuhës së huaj. Por, disa minuta pas nisjes së testimit, në rrjetet sociale ka nisur publikimi i tezave të, që sipas zotimeve të ministres së Arsimit Evis Kushi, do zhvillohej nën masa të rrepta mbikëqyrjeje për të shmangur të tilla shkelje.
Fotografimi i tezës me gjasë është bërë përmes telefonave celularë, që janë të ndaluar të mbahen nga nxënësit gjatë testimeve të maturës. Megjithatë, edhe pse në fuqi prej vitesh, kjo masë shkelet duke krijuar pabarazi mes maturantëve. Vitet e fundit, ndodh rëndom që pas çdo testimi, teksa nxënësit janë duke kryer provimin, në rrjetet sociale publikohen fotografi të tezave.
Më herët, Ministrja e Arsimit Evis Kushi bëri me dije ngritjen e një grupi pune që ka analizuar “thellësisht” Maturën Shtetërore për të dalë më pas me rekomandime.
Ajo është shprehur publikisht se “këtë vit, (testimet) do të zhvillohen në salla të mëdha dhe do të monitorohet nga një numër më i lartë vëzhguesish për çdo qendër provimi”.
Gjatë një takimi me maturantë në Vlorë në Janar të këtij viti, Kushi tha se një nga risitë këtë vit do të ishte “organizimi i provimeve në salla të mëdha”. “Sepse ne duam që të ketë transparencë të ketë meritokraci, dhe monitorimi i procesit të provimeve të jetë sa më efikas”, tha ministrja.
Megjithatë, publikimi i tezave në rrjetet sociale tregoi se Ministria e Arsimit dështoi sërish në këtë aspekt.
