Kryeministri Edi Rama ka publikuar sot pjesën e radhës së podcast-it të tij ‘Flasim’. Në episodin e sotëm, Rama kishte të ftuar 4 të rinj të huaj që kanë zgjedhur që të jetojnë dhe punojnë në Shqipëri.
Rama gjatë bisedës u shpreh se Shqipëria të kthehet në varësi dhe se askush që vjen i huaj këtu nuk dëshiron të largohet. Sa për shqiptarët që ikin,
Rama u shpreh se duan që të provojnë eksperienca të reja dhe kjo është e kuptueshme. Ndër varësitë që sipas Ramës të mbajnë në Shqipëri është edhe kafeja, pasi sipas tij nuk ke ku të pish një ekspres në Berlin dhe të thuash ‘uau’.
“Shqipëria të kthehet në varësi. Kam parë shumë njerëz, për shembull, të huaj me të cilët kam lidhje për hir të punës, ambasadorë, të cilët, ndoshta, kur kanë ardhur, nuk kanë qenë entuziastë, për ta thënë butë, por nuk kam parë asnjë të lumturohet kur largohet nga vendi. Sigurisht, janë shqiptarët që ende duan të largohen, të provojnë eksperienca të reja, por është e kuptueshme, është shumë e kuptueshme.
Ky është një moment në histori, kur ka një mundësi që ne nuk e patëm për shumë vjet, por, në të njëjtën kohë, po dëgjoja Uardën dhe dëgjoj me kujdes njerëzit që kthehen. Më kujtohet edhe vetja, se edhe unë kam qenë emigrant dhe, e di, vjen një moment kur ke nevojë për këtë, ke nevojë për këtë atmosferë, ke nevojë për këtë ngrohtësi, madje edhe për mungesën e rregullave rigoroze të qarkullimit rrugor dhe ke nevojë edhe për ekspresin. Ku mund ta pish një ekspres në Berlin, më thuaj? Ku mund ta pish një kafe në Berlin, që të thuash ‘uau’”, tha Rama.
