Nga BoldNews.al
Në datën 26 mars të këtij viti, Erion Veliaj, kryetari i Bashkisë së Tiranës, do të deklaronte se “sapo mbolla pemën e 1 miliantë në Tiranë”. Ai premtoi se do t’i bënte 2 milionë deri në vitin 2030. Normalisht, ky premtim u bë para zgjedhjeve lokale të 14 majit, ku në muajt mars, prill e maj, ai u pa me kasma dhe lopata duke tentuar të mbjellë pemë. Pas kësaj deklarate, të gjithë i kërkuan se “ku janë mbjellë 1 milionë pemët”? Dhe, përgjigjja e tij, ishte se nuk janë vetëm në qytet, por edhe në fshatra, pasi me ndarjen e re territoriale, bashkia ka marrë nën administrim edhe ish-komunat, Dajt, Farkë, Ndroq, Baldushk, etj. Por, a janë mbjellë këto pemë në këto ish-komuna, apo në fshatrat e tyre siç thotë Veliaj? Disa javë pas këtyre deklaratave, institucionet nën varësinë e Lali Erit, kanë hapur tendera për të prerë dhe jo për të mbjellë pemë në këto fshatra.
BoldNews.al ka siguruar dokumentet e një tenderi të hapur nga Agjencia e Parqeve dhe Rekreacionit, një institucion në varësinë direkte të Bashkisë së Tiranës. Objekti i këtij tenderi të hapur në datën 31 maj 2023, 17 ditë pas zgjedhjeve, është “prodhim i lëndës drusore”. Fondi për këtë tender është 35.833.333 lekë pa TVSH, ndërsa kohëzgjatja e kontratës është deri më datë 31 dhjetor 2023. Por, ku do të priten këto pemë? Ku do të shkojë sëpata me leje e Veliajt? BoldNews.al vijoi të hulumtojë dokumentet, ku mësoi se do të jenë në disa ngastra me pyje, pra në zonët më të pyllëzuara në Tiranë, ato që deri më tani janë mbrojtur më shumë nga banorët e zonës sesa nga vetë shteti. Ndërhyrja dhe mosndërhyrja e institucioneve shtetërore, ka shkatërruar këto 30 vite pyjet në Shqipëri, teksa zonat më problematike kanë qenë ato që iu janë dhënë privatëve për ta shfrytëzuar. Dhe, s’ka si të ndodhë ndryshe edhe me Veliajn, i cili nga një anë trumbeton me të madhe se ka mbjellë kaq e aq pemë dhe nga ana tjetër jep leje për t’i prerë. Një farsë e madhe e “pyllit orbital”, teksa këtë refren do e dëgjojmë edhe pas 2 vitesh, kur të kemi zgjedhjet parlamentare. Por deri atëherë, pyjet në këto zona do të priten, me “sëpatën” me leje të Bashkisë së Tiranës.
Dokumentet e mësipërme janë të vetë Bashkisë së Tiranës, e cila shkruan se vendi i kryerjes së shërbimeve, do të jetë në 3 pyje më të bukur të rrethit të Tiranës. “Shërbimi i shfrytëzimit të materilit drusor nga subjekti i kontratuar do të ofrohet në ekonomitë pyjore dhe ngastrat e nëngastrat si më poshtë:
- Ekonomia Pyjore “Fag”, ngastra nr. nr. 131.a, 132.a, 136.a, 116.a në sasi “5.523 m3”.
- Ekonomia Pyjore “Rove – Lunxhë” ngastra nr. 13.a, 27.a në sasi “1.329 m3”.
- Ekonomia Pyjore “Baldushk” ngastra nr. 6.a, 13.a në sasi “1.179 m3”.
Të tria këto zona janë më të pyllëzuarat në Tiranë, ku “Fagu” është në Malin e Dajtit, ndërsa “Rove Lunxhë” dhe “Baldushk” janë në pjesën perëndimore të Tiranës, në zonën e Baldushkut. Të dyja zonat, si Mali i Dajtit, ashtu edhe Baldushku, janë ruajtur deri më tan inga banorët e zonës, të cilët do të shohin për disa javë kamionë dhe skrepa që do të shkojnë në male dhe do të presin pyjet. Në dokumente janë shkruar edhe metrat që do të priten, teksa sëpata dhe sharra do të jetë më e rëndë në “Fag”, në Malin e Dajtit, ku do të priten plot mbi 5 mijë metër kub dru. Në dokimente sqarohet se shuma totale që do të priten do të jetë rreth 8 mijë metër kub, ndërsa sipërfaqja do të jetë qindra hektarë.
