Kryetari demokrat Sali Berisha, duke folur në Kuvend për raportin e diskriminimit, ka akuzuar Edi Ramën dhe qeverinë e tij se ka ndërtuar një piramidë të zezë diskriminimi në vend.
Gjatë fjalës së tij, Berisha përmendi edhe arrestimin e ish-kryebashkiakut të Durrësit, Vangjush Dakos, duke akuzuar se pse Erion Veliaj nuk ndëshkohet njësoj si Gjushi. Berisha shprehet se “Gjushi i Tiranës” nuk arrestohet as pse ka vjedhur faturat e 1 mln fidanëve dhe as pse ka ngritur dhjetëra pallate kate mbi kate.
“Gjushi arrestohet dhe burgoset për një tender, me meritë të plotë i arrestuar, për një pallat me meritë të plotë. Po ky Gjushi i Tiranës, i cili mashtron ka vjedhur faturat e 1 mln fidanëve, çfarë pëson ky. Çfarë flasim këtu për diskriminim.
Gjushi burgoset për një pallat, se janë shtuar disa kate dhe e meriton plotësish, por ky Gjushi i Tiranës që ka jo një por dhjetëra pallate kate mbi kate. Kalon pa hy ferra në këmbë. Gjushi, ky kriminel elektoral që meriton vetëm për atë, çdo dënim, dënohet për një tender se e ka shumëfishuar shumën.
Po Gjushi i Tiranës që u vjedh qytetarëve të Tiranës, për ndërmarrjen e tij dhe të Edi Ramës, në çdo ton plehra nga 11 euro që është në kontratë, 29 euro, u vjedh 18 euro. Ky shtron darka, dreka, pritje, përcjellje. Ky është vendi i diskriminimeve më të tmerrshme.”- thotë Berisha.
