Mbledhja e kryesisë së PD-së së vulës ku u vendos për hapjen e garës së menjëhershme për kryetar u shoqërua me tensione të shumta, përplasje, dhunë verbalë dhe gati edhe dhunë fizike.
Enkeled Alibeaj mbrojti dhunën e ushtruar nga mbështetësit e Bashës ndaj deputetëve dhe gazetarëve.
“Ju jap garancinë se në mbledhje asnjëri prej anëtarëve nuk ka qenë as nën presion dhe as në shantazh, unë isha në mbledhje. Them atë që mendoj dhe perceptoj. Asnjë s’ka qenë në presion, ka pasur mendime të ndryshme. Prania e këtyre njerëzve nuk ishte kërcënim. Jo, s’ishte presion. Nuk ka pasur asnjë dhunë, fjalë ka pasur. Nëse secili prej jush është ndjerë i fyer apo ndonjë situatë jo normale, keni të drejtën tuaj të thoni gjithçka ka ndjeni. Aty është thënë opinioni i gjithsecilit për mënyrën se si duhet të ecë përpara PD,” tha Alibeaj.
Ai komentoi edhe deklaratën e Gazment Bardhit që foli për një grup paramilitar.
“Qëndrimet emocionale mos i merrni. Në mbledhje, për aq sa zgjati, asnjë prej anëtarëve të kryesisë nuk ka qenë në presion. Unë isha në mbledhje, po them atë që mendoj dhe perceptoj unë. Ka pasur qëndrime të ndryshme, ku kanë brenda emocione dhe tensione. Por nuk është kërcënim. S’ka pasur presion,” tha Alibeaj.
Bardhi i përgjigjet Alibeajt se: “Qëndrimet emocionale nuk kanë asgjë të keqe kur janë të vërteta. Qëndrimi im ka qenë parimor. Unë kam dënuar dhunën, qoftë edhe verbale, për shkak të mendimit ndryshe.
Unë nuk mund të amnistoj veprime të patolerueshme, kjo është të jesh koherent në qëndrimet e tua, por të mbash qëndrime parimore dhe të thuash atë që ti mendon dhe beson”.
Më poshtë iu sjellim pamje nga dhuna e ushtruar nga mbështetësit e Bashës ndaj gazetarëve dhe deputetëve që Alibeaj e mohon:
Jashtë ambienteve të kryesisë, mbështetësit e Bashës iu kanë kërkuar llogari deputetëve “rebelë”, duke iu thënë “t’ju vijë turp”, “po na torturoni”, apo kërcënime të tipit “nëse shkoni te Berisha do ta keni pisk punën”.
Mbështetësit e Bashës kanë ushtruar dhunë verbale dhe kanë ofenduar edhe gazetarët që raportonin nga ambientet e jashtme ku mbahej mbledhja e kryesisë.
