Joana Duro, sekretare e Ministrisë së Shëndetësisë u vu në pranga pasi sipas SPAK, ka marrë ryshfet 3 mln lekë për të favorizuar një kompani në fitimin e një tenderi nga MSH me vlerë sa dyfishi i shumës së marrë në mënyrë antiligjore.
Në pranga u vu edhe Laura Sheto, me detyrë Specialiste e Nivelit të Lartë në Agjensinë e Ofrimit të Shërbimeve Publike të Integruara, e cila sipas hetuesve është personi që i dha shumën monetare Duros.
Tenderi
Tenderi në fjalë – me objekt “Lot 1 “Supervizim për rikonstruksionin e disa Qendrave Shëndetësore në qarqet Tiranë e Durrës” dhe fond limit rreth 8 mln Lekë të vjetra (805,872.23 Lekë) është çelur më 10 Maj dhe fituesi është shpallur 12 ditë më pas.
Fituesi i tenderit u shpall kompania “DRICONS” sh.p.k. që parqiti ofertën 6.7 mln Lekë të vjetra (672,457.60 Lekë). Në total, në garë kanë qenë tetë kompani, tre prej të cilave kanë paraqitur ofertë më të ulët se fituesi.
Tre kompanitë që dhanë ofertat më ulëta, bashkë me tre të tjera, janë s’kualifikuar. Në këto kushte, fitues është shpallur si ofera më ekonomike “DRICONS”, që sipas sipas të dhënave në Qendrën Kombëtare të Biznesit rezulton në pronësi të Vladimir Topit.
Hetimet
Prokuroria e Posaçme Kundër Korrupsionit dhe Krimit të Organizuar bën me dije se se mbi bazën e informacioneve të siguruara nga Hetuesit e Byrosë Kombëtare të Hetimit, ka regjistruar procedimin penal 10/1 të vitit 2023, për veprat penale “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Korrupsioni aktiv i funksionarëve të lartë shtetërorë ose të zgjedhurve vendorë”.
“Nga ndjekja me metoda speciale të hetimit janë grumbulluar prova të cilat kanë evidentuar se, një operator ekonomik do të jepte një përfitim të parregullt (në formën e shumave monetare) me qëllim shpalljen fitues në një procedure prokurimi të zhvilluar nga Ministria e Shëndetësisë e Mbrojtjes Sociale (në cilësinë e Autoritetit Kontraktor), Prokurimi në fjalë ishte me objekt ‘Lot 1 ‘Supervizim për rikonstruksionin e disa Qendrave Shëndetësore në qarqet Tiranë e Durrës’”, njofton SPAK.
“Pas kryerjes së disa veprimeve hetimore, u krijuan dyshime se shtetësja Joana Duro, me detyrë Sekretare e Përgjithshme e Ministrisë së Shëndetësisë e Mbrojtjes Sociale ka marrë një përfitim të parregullt në shumën prej 330.000 (treqind e tridhjetë mijë) lekë, për të favorizuar një Operator Ekonomik. Këto vlera monetare u dhanë nga shtetësja Laura Sheto, me detyrë Specialiste e Nivelit të Lartë në Agjensinë e Ofrimit të Shërbimeve Publike të Integruara”, shtojnë të njëjtat burime.
Akuzat dhe paratë që u sekuestruan
Të akuzuarat u vunë në pranga pasditen e djeshme në një operacion nga Hetuesit e Byrosë Kombëtare të Hetimit në bashkëpunim me Forcën e Posaçme Operacionale në Drejtorinë e Përgjithshme të Policisë së Shtetit, nën drejtimin dhe kontrollin e SPAK.
Të dyja akuzohen për veprat penale “Korrupsioni pasiv i funksionarëve të lartë shtetërorë ose i të zgjedhurve vendorë” dhe “Korrupsioni aktiv i funksionarëve të lartë shtetërorë ose të zgjedhurve vendorë”.
“Gjithashtu, në zyrën Sekretares së Përgjithshme u bë e mundur edhe sekuestrimi në cilësinë e provës materiale të shumës prej 330 000 (treqind e tridhjetë mijë) lekë (shumë e cila përbën përftimin e parregullt të dhënë nga shtetësja L.Sh.)”, thotë SPAK.
