Kryetari demokrat Sali Berisha, në konferencën e përjavshme me gazetarët, ka komentuar lirimin e Saimir Tahirit nga burgu ditën e sotme.
Gjyqtarja e Elbasanit Matilda Fetahu vendosi këtë të Premte të pranojë kërkesën e mbrojtjes së Tahirit pas paraqitjes së disa raporteve mjekësore, duke liruar ish-ministrin nga qelia. Raportet mjekësore lidhen me bashkëshorten e ish-ministrit dhe sipas tyre ajo ka probleme shëndetësore. Pasi i mori në shqyrtim, Gjykata vendosi që pjesën e mbetur të dënimit, Tahiri ta kryejë në shtëpi. Akuza e përfaqësuar nga prokurori Mustafa Turku shprehu dakordësi me kërkesën e mbrojtjes.
Berisha deklaron se Tahiri u lirua me urdhër të Edi Ramës pasi ai i vuri ultimatum. berisha shton se Tahiri e ka paralajmëruar kryeministrin se do ti “zbërthejë lidhjet kriminale të Olsit nga Meksika deri në Afrikë të Jugut”.
“U lirua me urdhër të Edi Ramës, me ultimatum që Tahiri i çoi Edi Ramës se është dita e fundit e durimit përndyshe do zbërthej lidhjet kriminale të Olsit dhe të Edit nga Meksika deri në Afrikë të Jugut. Është një urdhër direkt i Edi Ramës. Saimir Tahiri ia dha këtë paralajmërim botërisht dhe zyrtarisht që unë do di të mbrohem, dhe më në fund ai arriti ta mposhtë Edi Ramën i cili është i ngërthyer në aferën McGonigal dhe po bën lobimin më të fuqishëm që të shpëtojë. Por nuk do shpëtojë dot me gjithë angazhimin e Sorosit dhe miqve të vet.
Unë kam bindjen se drejtësia amerikane do i tregojë vendin këtij korruptori të McGonigal.”- tha Berisha.
