Presidenti i FSHF-së, Armand Duka ishte i pranishëm në festën e titullit kampion të Partizanit, ku i dorëzoi trofeun skuadrës së drejtuar nga Colella.
Ai u shpreh se ka qenë një kampionat i bukur dhe me rivalitet.
“Kishte kampionat me shumë garë dhe deri pak minuta më parë nuk dihej kush dilte kampion. Në fund dikush gëzon dhe dikush mërzitet por të gjithë të gëzohen për kontributin që kanë dhënë për futbollin dhe spektatorët. I falënderoj klubet dhe tifozët, mediat për kritikat dhe të gjitha. Uroj një përfaqësim dinjitoz në Europë.”
Por kjo deklaratë e zotit Duka është një hipokrizi e pastër në rastin më të mirë, pasi përfundimi i kampionatit ishte përfolur qysh në fillimet e tij se si do përfundonte.
Gjithashtu mjafton të kujtojmë atë që ndodhi para 4 ditësh në Rrogozhinë për të kuptuar hipokrizinë e zotit Duka.
Pas ngjarjeve të Rrogozhinës, ku Bylisit ju dha një penallti e paqenë dhe eskalimit të situatës deri në acarimin ekstrem të tifozëve të Tiranës, dihej shumë qartë që kampionati i kishte dhënë verdiktet nga vartësi i Dukës Kridens Meta.
Megjithatë i mësuar me këto situata në të gjitha nivelet e futbollit në Shqipëri zoti Duka se ka problem të dali e të shesë sapunin për djathë.
Ndërkohë pasi ezauroi çështjen e titullit, Duka u ndal edhe te Kombetarja. Ai u shpreh si Shqipëria në kualifikueset e Euro 2024 duhet të vlerësojë çdo kundështar.
“Duhet të marrim maksimumin. Janë më të vështira se kundër ekipeve që duken më të forta. Moldavia dhe Ishujt Faroe mund të të japin ndjesinë e mendjemadhësisë por duhet që t’i vlerësojmë edhe ato”, tha Duka.
