Nga Boldnews.al
Në katër komunat me shumicë serbe në veri të Kosovës u votua për pushtetin lokal, ku lista serbe bojkotoi zgjedhjet, pas thirrjes që u erdhi nga Beogradi zyrtar. Me pjesëmarrje të ulët, kryetarët e zgjedhur dolën nga parti shqiptare, dy nga Vetëvendosja dhe dy nga Lidhja Demokratike e Kosovës.
Ditën kur kryetarët tentuan të futen në zyrë, qindra qytetarë të frustruar të komunitetit serb që jetojnë në veri të Kosovës derdhën mllef, gurë, molotovë e madje zbrazën edhe armë ndaj forcave të policisë së Kosovës. Faktori ndërkombëtar dënoi viktimën, dhe jo agresorin. E gjitha në emër të ruajtjes së stabilitetit, e cila më shumë po destabilizon dhe nxit dhunën nga komuniteti serb që jeton mes krimit të organizuar, trafiqeve dhe bandave të armatosura që mbështeten nga qeveria serbe.
“Shtetet e Bashkuara të Amerikës dënojnë ashpër veprimet e Qeverisë së Kosovës për të hyrë me forcë në ndërtesat komunale në veri të Kosovës, veprime që ajo ndërmori kundër këshillave të Shteteve të Bashkuara dhe partnerëve evropianë të Kosovës”, tha sekretari amerikan i shtetit, Antony Blinken. Më pas në seri me të njëjtën qëndrim vijuan edhe Departamenti Amerikan i Shtetit dhe ambasdorët e vendeve të BE-së.
Me shumë të drejtë pyetja që ngrihet është se a mund të cilësohen zgjedhje demokratike kur ata bojkotohen masivisht dhe nuk marrin pjesë forca të tjera, por vetëm një përfaqësues politik? Kemi dy standarde në lidhje me çështjen e zgjedhjeve. Edhe pse me specifikë të ndryshme, e njëjta situatë ishte edhe në Shqipëri në vitin 2019.
Opozita, pas djegies së mandateve të deputetëve bojkotoi edhe zgjedhjet lokale. Kjo nuk e pengoi Ramën që të zhvillonte votime moniste ku në më shumë se gjysmën e bashkive të vendit kishte vetëm kandidati i tij. Mori të 61 bashkitë e vendit, jo me frymën qytetare, por me bekimin e burokracive ndërkombëtare që edhe tek ne u bë më më të fortin, duke lënë në dorë të dytë demokracinë.
Në atë kohë, ‘amerikanët e Shqipërisë’ jo vetëm njohën këtë votim, por kërcënuan opozitën se nëse do protestonin do shpalleshin “organizatë e paligjshme”. E njëjta situatë por me kënde tërësisht të kundërta paraqitet sot në Kosovë, ku Kurtin po e kërcënojnë që të tërheqë forcat policore të cilat me të drejtë u vunë në mbrojtje të kryetarëve të komunave të zgjedhur pa pjesëmarrjen e serbëve. Gjuha e DASH-it në Shqipëri është e ndryshme me atë të DASH-it në Kosovë.
Viktima po cilësohet fajtore në Kosovë, ndërsa agresori në Shqipërinë e vitit 2019 u konsiderua i ligjshëm duke ia pranuar votimet moniste, madje i dhënë edhe një dorë propagande ku përfaqësuesit e SHBA-ve në vendin tonë shfaqeshin kudo krah kryebashkiakëve të votuar nga një parti dhe jo të zgjedhur si alternativë pluraliste politike.
