Nga Boldnews.al
Autoriteti Rrugor Shqiptar ka bërë një prapaktheu për një nga kontratat më të majme, atë të mirëmbajtjes së tunelit të Krrabës, në aksin rrugor Tiranë-Elbasan. Para pak ditësh, BoldNews.al publikoi ekskluzivisht dokumentet e kësaj procedure, e cila kishte një vlerë rreth 6 milionë euro. Madje, vlera i referohej një dokumenti të Agjencisë së Prokurimit Publik. Por, pas denoncimit, Berberi i ARRSH-së, nga frika e mediave, SPAK-ut, eprorëve, ka ulur me plot 2 milionë euro këtë vlerë, duke e bërë më pak se 4 milionë euro! Pra, me një të rënë të lapsit, Berberi e “qethi” këtë vlerë. Natyrisht, pas këtyre veprimeve, ngrihen shumë pyetje; përse u ul pas denoncimit? Kujt ia kishte premtuar Berberi këtë tender? A ia tërhoqi ndonjë epror “veshin”? Nëse mirëmbajtja realizohet me këtë vlerë, përse e publikoi me mbi 30 % më shumë fondin? A ka ndonjë hetim SPAK apo ndonjë organ tjetër ligjzbatues për këto vendimmarrje? Por le ti analizojmë faktet një e nga një, duke iu referuar dokumenteve të vetë Autoritetit Rrugor Shqiptar.
Disa ditë më parë, BoldNews.al publikoi një investigim me titull: “Balluku-Berberi paracaktojnë tenderin 6 milionë euro për tunelin e Elbasanit?”. Në këtë shkrim ne analizuam dokumentet e vetë ARRSH-së të publikuara në Agjencinë e Prokurimit Publik. Por, ngritëm edhe dyshime, pasi nga krahasimi i dokumenteve të tenderit në 2023 me atë në vitin 2021 dukej se fituesi ishte i paracaktuar. Në dokumentin që publikuam, të cilin po e publikojmë sërish (më sipër), ARRSh shkruan se shpalli tenderin e mirëmbajtjes së tunelit në Krrabë, pjesë e autostradës Tiranë-Elbasan. Më saktësisht, objekti i tenderit ishte “mirëmbajtje tuneli i Krrabës (2023-2027)”. Fondi i kësaj procedure ishte 583.333.333 lekë. BoldNews.al publikoi edhe dokumentet e tenderit të ngjashëm të vitit 2021, i cili kishte një fond rreth 2 mlionë euro për 2 vite. Nëse do e krahasojmë procedurën e tanishme, vihet re se vlera është rritur në rreth 20 % të fondit të akorduar. Procedura e mëparshme u fitua nga kompania “4 A-M”, e cila ofroi në atë kohë 189.360.000 lekë, ose sa 100 % të fondit limit. Në procedurë mori pjesë vetëm “4 A-M”.
Më sipër faktuam, sërish me dokumente zyrtare, se fondi për mirëmbajtjen e tunelit në Krrabë ishte 583.333.333 lekë. Ndërkohë, i njëjti dikaster, ka shpallur një tjetër njoftim tenderi (dokumenti më sipër), ku thotë se fondi ka zbritur në 379,248,000 lekë. Pra, 204.085.333 lekë më pak, ose rreth 2 milionë euro më pak! Siç edhe po e lexoni më lart në dokument, objekti i kontratës është “mirëmbajtje tuneli i Krrabës (2023-2027)”. Pra, afati është i njëjtë. Por vlera është ulur ndjeshëm! Në dokumente thuhet se afati i fundit për paraqitjen dhe hapjen e ofertave është data 23 qershor 2023, ndërsa nisur edhe nga dokumentet standarte apo edhe dokumente të tjera shoqëruese, pritet që fituesi të jetë i njëjtë. A do të garojë me veten apo do të ketë ndonjë firmë tjetër mburojë?!
LEXO EDHE:
Balluku-Berberi paracaktojnë tenderin 6 milionë euro për tunelin e Elbasanit?
