Ish-kryeministri Sali Berisha nga Kuvendi tha se vendimi për rritjen e pagave të deputetëve dhe ministrave është cinik, sipas tij më parë duhet të miratohet minimumi jetik për qytetarët.
Berisha tha se duke miratuar minimumin jetik prej 200 euro për qytetarët, u mundësohet nxjerrja nga varfëria ekstreme dhe jo të rriteshin pagat nga lart posht.
“Propozuam të vendosnim minimumin jetik, ti japim çdo shqiptari 200 euro jashtë çdo politike. Duke i dhënë 200 euro ne nxjerrim nga varfëria ekstreme çdo shqiptar, njerëzit janë të varfër se i vjedh dhe varfëron qeveria. Me 200 euro ne çdo pensionist, e të papuni e nxirrnim nga humnera e varfërimit, nga më e keqja kurse ju rrisni rrogat nga sipër lart. Ky është cinizëm, skeni lidhje me qytetarët përveç se ti vidhni votat, kalonit nga një komunitet në tjetrin dhe sot bëni ligjin cinik sot”, tha Berisha.
Pjesë nga fjala e kryetarit të PD-së, Sali Berisha:
“Keni sjellë këtu një ligj që do të doja ta votoja se kam qenë dhe mbetem gjithnjë për rritjen e rrogave dhe pensioneve.
Kam bindjen më të thellë se vetëm me gjysmën e asaj që vidhni çdo vit, pagat do mund të dyfishohen. Por nuk e votoj kurrë këtë ligj, sepse është një mashtrim i tmerrshëm. Sepse institucionet e pavarur kanë gjetur se ndërsa dyfishoni rrogat e zyrtarëve të lartë, zbrisni me 1 përqind rrogat e mësuesve, rrogat e arsimit parauniversitar, rrogat e policëve, rrogat e ushtarakëve.
Pra, ju kryeni një akt të turpshëm. Për vete rrisni rrogat, për të tjerat bëni një indeksim. Dhe çfarë indeksimi, indeksim me inflacionin njëvjeçar. Dhe me gjithë këtë indeksim, përsëri në raport me inflacionin, disa kategori më në nevojë detyrohen të mbeten me minus.
Propozuam që të vendosim minimumin jetik në një periudhë kur sirenat e mjerimit po ulërijnë në gjithë vendin. T’i japim çdo qytetari 200 euro, llogari kjo e Avokatit të Popullit.
Duke u dhënë nga 200 euro, nxjerrim shqiptarët nga varfëria ekstreme. Shqiptarët nuk kanë lindur të varfër, por i vjedh qeveria, i keqtrajton qeveria. Me 200 euro, çdokënd e nxirrni nga humnera ekstreme që quhet mjerim. Kurse ju rrisni rrogat e larta, ky është cinizëm, kjo është pashpirtësi. Ju nuk keni asnjë lidhje me qytetarët, e vetmja gjë që u lidh është t’u vidhni votat.”
