Një nga personat e shoqëruar nga policia greke gjatë aksionit për vënien në pranga në Laert Haxhiut, rezulton persona në kërkim nga autoritetet shqiptare.
Policia konfirmoi këtë të mërkurë se pas verifikimeve, Firedus Berberi u vu po ashtu në pranga bashkë me Laert Haxhiun. Ky i fundit është sipas hetimeve një prej dy qitësve në vrasjen që njihet si masakra e Lushnjes.
Berberi akuzohet si një nga dy autorët e plagosjes me armë zjarri të Johan Muçllarit, ngjarje e ndodhur në Prill të 2022-t në Pogradec. 2 muaj pas kësaj ngjarjeje, policia arrestoi njërin prej tyre, Griseld Maxharin, ndërsa Firdeus Berberi u shpall në kërkim. Prej asaj kohë, ai vijonte të ishte në kërkim ndërkombëtar. Ndaj Berberit, gjykata e Pogradecit ka caktuar masën e sigurisë së arrestit me burg në mungesë.
“Gjatë operacionit ndërkombëtar të koduar ‘Eksponenti’, të finalizuar falë informacioneve të siguruara nga Policia e Shtetit dhe shkëmbimit të tyre në kohë reale, ndërmjet Interpol Tiranës dhe Interpol Athinës, u lokalizua në Janinë, u kap dhe u arrestua me qëllim ekstradimin, i shumëkërkuari Laert Haxhiu, bashkë me të cilin janë shoqëruar në Policinë e Janinës, edhe 2 shtetas të tjerë shqiptarë që shoqëronin shtetasin e shumëkërkuar. Nga verifikimet e kryera ndërmjet Policisë greke dhe Policisë shqiptare, ka rezultuar se njëri prej këtyre shtetasve, konkretisht shtetasi F.B., 22 vjeç, lindur në Pogradec, ishte i shpallur në kërkim kombëtar nga Drejtoria Vendore e Policisë Korçë. Gjykata e Rrethit Gjyqësor Pogradec ka caktuar ndaj 22-vjeçarit, masën e sigurisë ‘Arrest në burg’, në mungesë, për veprën penale ‘Plagosja e rëndë me dashje’, pasi më 25 prill të vitit 2022, dyshohet se në bashkëpunim me një shtetas tjetër, shtetasi F.B. ka plagosur rëndë, me armë zjarri pistoletë, shtetasin J.M.”, njofton policia.
Policia e Shtetit në bashkëpunim me Ministrinë e Drejtësisë dhe me Prokurorinë e Përgjithshme ka nisur procedurat për shpalljen në kërkim ndërkombëtar dhe ekstradimin e këtij shtetasi drejt Shqipërisë, shtuan të njëjtat burime.
