Habib Rexha u vetëdorëzua në polici pasi ekzekutoi me një plumb në kokë Arian Gosën në Kavajë. Viktima ishte ulur në një lokal me të atin pranë shkollës “24 Maji” kur është qëlluar me plumb në kokë nga Rexha.
Ndërkohë, është zbardhur edhe dëshmia e 31-vjeçarit para grupit hetimor, ku ka thënë se vrasjen e kreu pasi ai dhe familja e tij ndiheshin të kërcënuar. Ai ka deklaruar se kur Arian Gosa ishte kthyer nga Italia, kishte thënë se do ta shuante familjen Rexha.
“Une jam autori i vrasjes së Arjan Gosës. Vrasjen nuk e kam kryer për gjakmarrje, por për arsye se Arjani kur ishte kthyer nga Italia është shprehur se do ta na shuante si familje. Kësaj, unë i bëra parapritë. Sa të na vriste ai neve, pashë të udhës ta vrisja unë i pari. Vëllezërit e mi dhe babai nuk kishin fare dijeni. E dija qe Arjani pinte kafe te lokali pranë shtepisë së tij. Shkova e qëllova dhe më pas u largova në drejtim të Durresit. Pistoletën e hodha në afërsi të pistës Iliria në Durrës tek ca gurë”, ka deklaruar ndër të tjera Habib Rexha.
Policia ka gjetur pistoletën në vendin që tha Rexha se e kishte hedhur dhe e ka dërguar në laboratorin balistik. Ndërkaq, edhe automjeti i përdorur nga Rexha është gjetur po në Durrës.
Ndërkohë është arrestuar edhe shoku i Rexhës, Ervis Kurti, pasi e ndihmoi të arratisej nga vendi i ngjarjes.
- Vrasja e dy muajve më parë
Arian Gosa është vëllai i Edmond Gosës, i cili u vra më 29 Mars, gjatë një konflikti po në Kavajë, nga vëllai i Habib Rexhës.
Edmond Gosa, i cili njihej edhe me emrin Armand Gosa, mbeti i vrarë pas një konflikti me Sali Rexhën, i njohur po ashtu me emrin Altin Rexha. Ngjarja në fjalë ndodhi në një lokal dhe dy 43-vjeçarët vranë njëri-tjetrin. Gosa e goditi me thikë, ndërsa Rexha e qëlloi me armë.
Sherri mes palëve kishte nisur në verën e vitit 2022 në një lokal në Kavajë. Sipas hetimeve, Armand Gosa kishte ofenduar Altin Rexhën me origjinë duke i thënë se “malokët nuk kanë punë në Kavajë”. Prej atij momenti, Rexha dyshohet se kishte marrë një armë pa leje dhe e mbante për vetëmbrojtje.
