Belind Këlliçi, kandidati i koalicionit “Bashkë Fitojmë” në Tiranë më 14 Maj thotë se Enkelejd Alibeaj u ka bërë dëm demokratëve dhe PD-së me qëndrimet e tij.
“Ka disa emra që janë një vijë e kuqe. Unë nuk fola për një bashkim me zotin Alibeaj sepse zoti Alibeaj përveçse i ka bërë dëm me qëndrimet e tij demokratëve dhe PD-së, nuk i ka bërë asnjë shërbim” – tha Këlliçi në një intervistë në Klan News.
Lajmet se Lulzim Basha mund të kthehet në krye të PD-së i konsideron si gojëdhëna absurde dhe nuk e beson që do të ndodhë.
“Nuk e besoj. Mbetet në kuadrin e gojëdhënave. Nuk e besoj se kjo do të ndodhë. Nuk besoj se ka njeri me logjikë normale që mund të pranojë këtë tezë. Nuk e besoj, nuk dua ta besoj. Më duket absurde”, – tha Këlliçi.
Ai u shpreh se pas humbjes ka bërë një analizë të kutive të votimit në Tiranë. Sipas kandidatit të koalicionit “Bashkë Fitojmë”, ai ka fituar në zonat ku është e vështirë që të blihet ose manipulohet vota.
“Më rezulton që kam fituar diku tek 96 kuti në qendra votimi në Tiranë. Mbi 90% e tyre, 86 prej tyre janë në qytet, brenda vijës së verdhë aty ku është më i vështirë manipulimi… Ajo që ka ndodhur, ka ndodhur në komuna, në fshat, ku në raste të caktuara, kryebashkiaku fitonte me 80% dhe ky është absurditet i madh duke ditur që nuk ka hedhur një lopatë çakëll në 8 vite”, – tha Këlliçi.
