Gjykata e Posaçme ka lënë në burg Fredi Belerin, fituesi i bashkisë Himarë në zgjedhjet e 14 majit.
Ky vendim ka nxitur edhe reagimin e Greqisë, ku ministria e jashtme ka dalë me një reagim zyrtar.
Në deklaratë ministria shkruan se zgjatja e paraburgimit ofendon përceptimin evropian të shtetit të së drejtës.
“Zgjatja e paraburgimit të Fredi Belerit, tashmë i zgjedhur kryetar i bashkisë Himarë, ofendon ndjenjën e drejtësisë të publikut dhe perceptimin europian të shtetit të së drejtës”, thuhet në deklaratën e Ministrisë së Punëve të Jashtme greke.
Kandidati i koalicionit “Bashkë fitojmë”, në zgjedhjet e 14 majit, Fredi Beleri u arrestua në 12 maj, për akuzën e “korrupsionit aktiv në zgjedhje”.
Akuza ndaj tij u mbështet në disa filmime dhe përgjime mes tij dhe një të infiltruari, të cilit iu premtuan 400 mijë lekë të vjetër për 8 vota. Avokati i Belerit pretendoi se akuzat ndaj klientit të tij janë të montuara dhe të motivuara politikisht.
Rikujtojmë se Fredi Beleri teksa ishte në paraburgim në Vlorë është vizituar nga përfaqësues të ambasadës greke në vendin tonë.
