Lëvizja Bashkë ka dalë sot në protestë, lidhur me bilancin e 3 ditëve të fundit ku kanë vdekur dy puntorë ndërtimi.
Aktivistët kanë derdhur në shenjë revolte, bojë të kuqe në portën e ‘Ministrisë së Punës’.
Pamjet janë publikuar nga kreu i Lëvizjes Bashkë, Arlind Qori, ndërsa deri më tani nuk ka pasur asnjë reagim nga instancat përkatëse.
POSTIMI I PLOTË:
DY PUNËTORË NDËRTIMI TË VDEKUR NË TRE DITË
Asnjë institucion publik nuk do t’ia dijë. Pasi i ka vënë drynin Ministrisë së Punës dhe është mburrur për mungesën e sindikatave, Edi Rama vazhdon i bie dajres. Nëpër media kuitet për fatin e Sali Berishës. Të tjerët vazhdojnë bëjnë hesape pas rezultatit të zgjedhjeve.
Lëvizja BASHKË është e vetmja parti politike që e sheh me rëndësinë e duhur çështjen punëtore. Jo vetëm në terma humanitarë: si t’i shpëtojmë punëtorët nga vdekja dhe gjymtimi në punë? As thjesht në qasje politike: si të mundësojmë organizimin e punëtorëve për të drejtat e tyre? Por edhe në dimension ekonomik: Ekonomia shqiptare po dobësohet prej emigrimit masiv të forcës punëtore më vitale. Çdo ditë të ekzistencës tonë politike ne do të vazhdojmë të luftojmë për të drejtat e punëtorëve, për zhvillim ekonomik të qëndrueshëm dhe demokratizimin e shtetit.
